Ózbekstan Respublikası Prezidenti Shavkat Mirziyoev 27-yanvar kúni gezektegi Ózbekstan –Túrkmenstan siyasiy máhláhátlesiwleri sheńberinde mámleketimizde bolıp turǵan Túrkmenstan Ministrler Kabineti baslıǵınıń orınbasarı, sırtqı isler ministri Rashid Meredovtı qabılladı.

Sóylesiw aldınan ministr Rashid Meredov mámleketimiz basshısına Túrkmenstan Prezidenti Serdar Berdimuhamedov hám Túrkmen xalqınıń milliy jetekshisi, mámlekettiń Xalıq Másláhátshisi Baslıǵı Gurbanguli Berdimuhamedovtiń qızǵın sálemin hám jaqsı tileklerin jetkerdi.
Ózbekstan –Túrkmenstan doslıq, jaqsı qońsıshılıq hám strategiyalıq sheriklik baylanısların jáne de rawajlandırıw hám bekkemlewdiń áhmiyetli máseleleri dodalandı.
Tovar almasıw kólemi jedel ósip atırǵanı, 2024-jılı 1,1 milliard dollardan artqanı qanaatlanıwshılıq penen atap ótildi. “Shavat- Tashavuz” shegara aldı sawda zonası birgelikte qurılmaqta. Sanaat kooperaciyası, energetika, transport, logistika, awıl xojalıǵı hám suwdan paydalanıw tarawlarında tıǵız hám óz-ara paydalı birge islesiw izbe-iz dawam ettirilmekte. Aymaqlararalıq baylanıslar hám mádeniy-gumanitarlıq almasıwlar keńeyip barmaqta.
Tashkent qalasında Gurbanguli Berdimuhamedovtiń “Hakyda göwheri” (“Tafakkur gavhari”) atamasındaǵı jańa kitabınıń ózbek tilindegi basılımınıń prezentaciyası ótkerilgeni ushın Túrkmenstan basshısınıń atınan Ózbekstan jetekshisine tereń minnetdarshılıq bildirdi.
Ózbekstan hám Túrkmenstan arasındaǵı kóp táreplemeli sherikliktiń jańa keń kólemli kún tártibin qáliplestiriw, bolajaq joqarı dárejedegi saparlar, region mámleketleri basshılarınıń Másláhát ushırasıwı hám “Oraylıq Aziya plyus” formatındaǵı sammitlerge tayarlıq kóriwge ayrıqsha itibar qaratıldı.
Sonday-aq, xalıqaralıq siyasat máseleleri boyınsha da pikir alıstı.

ÓzA