Mámleketimizde keleshegimiz bolǵan jas áwladtı kitapqumarlıqqa tartıw, kitap basıp shıǵarıwdı jetilistiriw boyınsha alıp barılıp atırǵan keń kólemli jumıslar nátiyjesinde olardıń kitap oqıwǵa degen talabınıń artıp atırǵanlıǵı kóz quwandıradı . Usı baǵdarda alıp barılıp atırǵan ilajlar qatarında túrli taraw wákilleri hám keń jámiyetshilik arasında ótkerilip atırǵan hár qıylı tańlaw hám bellesiwler de ayrıqsha áhmiyetke iye bolmaqta.
Bul baǵdarda ÓzLiDeP baslaması menen respublikamız boylap dástúriy túrde ótkerilip kiyatırǵan «Dúrdana» joybarınıń ornı da ayrıqsha.

Nókis rayonlıq kásip-óner mektebiniń kitapxanasında ÓzLiDeP Nókis rayonlıq Keńesi tárepinen joybar sheńberinde ózbek hám qaraqalpaq xalıq shayırlarınıń dóretiwshiligine baǵıshlanǵan poeziya keshesi bolıp ótti.
Onda ÓzLiDeP Nókis rayonlıq Keńesiniń «Hayal-qızlar qanatı» aǵzası, Nókis rayonlıq kásip-óner mektebiniń psixologi Almaxan Nurimova shıǵıp sóylep, hayal-qızlar arasında kitapqumarlıq mádeniyatın qáliplestiriw, jaslardı kitap oqıwǵa keńnen tartıw, olardıń talantların anıqlaw hám qollap-quwatlaw baǵdarında sońǵı jıllarda alıp barılıp atırǵan ámeliy jumıslar haqqında aytıp ótti.
Ilaj Muhammed Yusup, Ibrayım Yusupov, Zulfiya Israilovanıń ómiri hám dóretiwshiligi, qosıqları haqqında qısqa videorolik prezentaciyası menen baslanıp, shayırlardıń Watan, doslıq, muhabbat, ana haqqındaǵı belgili qosıqları oqıldı.
Sonday-aq, ushırasıw dawamında “Ózbekstan – 2030” strategiyasın «Qorshaǵan ortalıqtı qorǵaw hám “jasıl” ekonomika jılı» nda ámelge asırıw boyınsha mámleketlik baǵdarlama joybarınıń mazmun-mánisi haqqında tolıq túsinik berilip ótildi.

Ilaj sońında shólkemlestiriwshiler tárepinen belsendi, úlgili kitapqumar oqıwshılarǵa estelik sawǵaları tapsırıldı.

Qaraqalpaqstan xabar agentligi