Búgin keń jámiyetshiliktiń dodalawı ushın járiyalanǵan «Ózbekstan – 2030» strategiyasın «Qorshaǵan ortalıqtı qorǵaw hám «jasıl» ekonomika jılı» nda ámelge asırıw boyınsha Mámleketlik baǵdarlama hám onı tastıyıqlaw haqqındaǵı Prezident Pármanı joybarın aymaq belsendileri, partiya deputatları hám keń jámietshilik úlken qızıǵıwshılıq penen úyrenbekte.

5 tiykarǵı baǵdardı óz ishine alǵan Mámleketlik baǵdarlama joybarınan qorshaǵan ortalıqtı qorǵaw hám “jasıl» ekonomika máseleleri, sonday-aq, sociallıq-ekonomikalıq, mámleketlik basqarıw, sud-huqıq, qáwipsizlik hám sırtqı siyasat baǵdarlarında 2025-jılǵa mólsherlengen keń kólemli reformalar, xalıqtıń abadanlıǵı hám Watanımızdıӊ rawajlanıwı jolındaǵı tiykarǵı wazıypalar orın alǵanı menen áhmiyetli.
Mámleketimizde máhállelerdiń ekologiyalıq kelbetin zamanagóylestiriw, átirap tazalıǵın támiyinlew ushın miyweli hám sayamanlı náller egiw, puqaralarda ekologiyalıq mádeniyattı qáliplestiriw, xalıqtıń salamatlıǵın bekkemlew, isbilermenlikti rawajlandırıw arqalı xalıqtı kámbaǵallıqtan shıǵarıw, adamlardıń turmıs sharayatın jaqsılaw baǵdarındaǵı tiykarǵı maqsetlerdiń orınlanıwın támiyinlewde biz deputatlar hám partiya xızmetkerleri jáne de nátiyjeli jumıs alıp barıwımız zárúr ekenligin ayrıqsha atap ótpekshimen.

2025-jılǵı Mámleketlik baǵdarlama joybarında belgilep berilgen insan potencialın júzege shıǵarıwǵa jaqınnan járdemlesiw, isbilermenlikti rawajlandırıw baǵdarında ámeliy jumıslardı kóbeytiw, xalqımızdıń baylıǵı bolǵan tábiyǵıy resurslardan únemli paydalanıw, «jasıl» ekonomika principlerin ámeliyatqa engiziw, suwdan únemli paydalanıw baǵdarındaǵı wazıypalar bizden jáne de kóbirek izleniw, jańadan-jańa joybarlardı ámeliyatqa engiziwde belsendilik etiwimizdi talap etpekte.

Mámleketlik baǵdarlama joybarın bunnan bılay da jetilistiriw boyınsha ÓzLiDep Qaraqalpaqstan Respublikası Keӊesi belsendileri hám deputatları anıq pikir-usınıslar beredi hám Baǵdarlamanıń orınlanıwın támiyinlew baǵdarındaǵı jumıslarda belsene qatnasadı.
Bul xalıqshıl hám turmıslıq hújjetten orın alǵan barlıq baǵdardaǵı maqset hám wazıypalar erteńgi kúnimizdi jáne de abadan etiwde, elimizdiń rawajlanıwın joqarı basqıshqa kóteriwde, sonday-aq, xalqımızdıń turmısın jaqsılawǵa xızmet etedi.

Alisher Djumanazarov ,Qaraqalpaqstan Respublikası Joqarǵı Keӊesi deputatı.
Qaraqalpaqstan xabar agentligi