ÓzLiDeP Qaraqalpaqstan Respublikası Keńesiniń májilisler zalında ótkerilgen dógerek sáwbetinde bıyılǵı 2025-jıl ushın “Ózbekstan – 2030” strategiyasın «Qorshaǵan ortalıqtı qorǵaw hám «jasıl» ekonomika jılı»nda ámelge asırıw boyınsha mámleketlik baǵdarlama hám onı tastıyıqlaw haqqında”ǵı Ózbekstan Respublikası Prezidentiniń Pármanı joybarı qızǵın dodalandı.

Ilajdı partiyanıń Qaraqalpaqstan Respublikası Keńesi «Jaslar mashqalaların úyreniw hám isbilermenlikti qollap-quwatlaw bólimi» niń baslıǵı K.Xudaybergenova kiris sóz benen ashıp, baǵdarlama joybarınan orın alǵan xalıqshıl hám turmıslıq tiykarǵı baslamalar menen ideyalardıń mazmun-mánisi haqqında sóz etti.
Sonday-aq, ilajda mámleketimizdiń siyasiy turmısında áhmiyetke iye bolǵan joybarlardı dodalaw hám olardıń keleshekte tarawdı rawajlandırıwda tutqan ornı partiyanıń “Jaslar qanatı” belsendileri tárepinen hár tárepleme dodalandı.
Ilajda qatnasqan student-jaslar, mámleketlik baǵdarlamalardıń nátiyjeli ámelge asırılıwı ushın puqaralıq jámiyeti, jaslar hám mámleket arasında tıǵız birge islesiw zárúr ekenligin atap ótti.
Dógerek sáwbeti joqarı dárejede shólkemlestirilip, studentlerdiń siyasiy hám sociallıq máselelerge bolǵan qızıǵıwshılıǵın jáne de arttırdı.
– Bolıp ótken sáwbetten mámleketlik baǵdarlama joybarı haqqındaǵı bilim hám kónlikpelerimizdi jáne de jetilistirdik. Joybarda alǵa qoyılǵan barlıq bántler insan ómiri hám onıń qádir-qımbatın joqarılatıwǵa qaratılǵanı menen bárshemizdiń itibarımızdı tarttı. Biz jaslar da bir qatar usınıslarımızdı aytıp, ózimizdi qızıqtırǵan sorawlarǵa juwap aldıq. Zamanlaslarım menen birgelikte mámleketlik baǵdarlamanı turmısqa engiziwde múnásip úlesimizdi qosıwdı wazıypa sıpatında belgilep aldıq,-deydi Berdaq atındaǵı QMU studenti Diyorbek Mirzabaev.

Qaraqalpaqstan xabar agentligi