Jaslardıń zamanagóy, hár tárepleme qolaylı bilim alıwı ushın jaratılǵan imkaniyatlardıń nátiyjeliligin arttırıw maqsetinde bir qatar ámeliy jumıslar alıp barılmaqta.

Qaraqalpaqstandaǵı joqarı bilimlendiriw shólkemlerin 2025-jılı rawajlandırıwdıń áhmiyetli baǵdarların hám jumısın jetilistiriw boyınsha usınıslar islep shıǵıw boyınsha dúzilgen Respublikalıq jumısshı topardıń gezektegi májilisi Nókis mámleketlik pedagogikalıq institutında bolıp ótti, – dep málimleme beredi NMPI baspasóz xatkeri I.Mátekov.
Májiliste Ózbekstan Respublikası Joqarı bilimlendiriw, ilim hám innovaciyalar ministri, jumısshı topar basshısı Qwnǵirotboy Sharipov qatnasıp, joqarı bilimlendiriw mákemelerin hár tárepleme rawajlındırıw maqsetinde islep shıǵılıp atırǵan jol kartasınıń joybarları kórip shıǵıldı.
Respublikalıq jumısshı topar aǵzalarınıń úyreniwleri nátiyjesinde joqarı bilimlendiriw mákemelerinde oqıw processlerin jetilistiriw, sanlastırıw hám bilimlendiriwdiń sapasın hám ilimiy-izertlewlerdiń nátiyjeliligin arttırıw boyınsha sóz etildi.
Sonıń menen birge, ilim, bilimlendiriw hám óndiristiń integraciyasın keńeytiw, jámiyetlik-ruwxıy ortalıqtı salamatlandırıw, student-jaslarda tárbiyalıq jumıslardıń sistemasın jetilistiriw, materiallıq-texnikalıq támiynat, oqıw laboratoriyaların zamanagóy ásbap-úskeneler menen támiyinlew, sırt mámleketlerdiń bilimlendiriw hám izertlew mákemeleri menen birge islesiw baylanısların jolǵa qoyıw baǵdarların islep shıǵılǵan usınıslar hár tárepleme dodalandı.

Qaraqalpaqstan xabar agentligi