Prezentaciya

2025-jıl 24-yanvar kúni Ózbekstan Respublikası Prezidenti janındaǵı Mámleketlik basqarıw akademiyasında túrkmen xalqınıń Milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedovtıń jaqında ózbek tilinde basıp shıǵarılǵan «Tafakkur gavhari» («Aqıl-oy gáwharı») kitabınıń prezentaciyası bolıp ótti.

Máresimde Ózbekstan Respublikası Prezidenti Administraciyasınıń wákilleri, Oliy Majlis Senatı hám Nızamshılıq palatasınıń aǵzaları, ministrlik hám uyımlar, mámleketimizdegi milliy mádeniy oraylar, ilim, bilimlendiriw hám mádeniyat, dóretiwshilik tarawlarınıń belgili ǵayratkerleri hám ǵalaba xabar qurallarınıń xızmetkerleri qatnastı.
Bizge belgili, ásirler dawamında bir dáryadan suw iship, hámiyshe bir-birine iyinles bolıp jasap kiyatırǵan tuwısqan ózbek hám túrkmen xalıqların ulıwmalıq tariyx, birdey mádeniyat hám iygilikli qádiriyatlar óz-ara baylanıstırıp turadı.
Hár eki mámleket basshıları – Ózbekstan Respublikası Prezidenti Shavkat Mirziyoev, Túrkmenstan Prezidenti Serdar Berdimuhamedov Túrkmenstan Xalıq Másláháti Baslıǵı Gurbanguli Berdimuhamedov tárepinen ámelge asırılıp atırǵan xalıqshıl siyasat, joqarı dárejedegi saparlar nátiyjesinde mámleketlerimiz arasındaǵı siyasiy-ekonomikalıq, mádeniy-gumanitarlıq baylanıslar kún sayın keńeyip barmaqta.
Tashkent qalasında «Ashxabad» mádeniyat hám dem alıw baǵı, Maqtımqulı estelik kompleksi, óz gezeginde, Ashxabad qalasında «Tashkent» mádeniyat hám dem alıw baǵınıń qurılǵanı bul baǵdardaǵı úlken ámeliy qádemler boldı.
Mámleket basshıları baslap bergen iygilikli dástúrlerge muwapıq.yu keyingi jılları hár eki mámlekette ádebiyatqa, kitapqumarlıqqa ayrıqsha itibar qaratılıp atırǵanın atap ótiw kerek.
Túrkiy mámleketlerdiń mádeniy shólkemi – TÚRKSAY menen birgelikte «Túrkiy ádebiyat dúrdanaları» 100 tomlıq kompleksi basıp shıǵarıldı, onıń 9 tomı túrkmen ádebiyatı úlgilerine baǵıshlanǵan. Olarda Ozodiy, Maqtımqulı, Mullanafas, Andalib, Mullamurod Xorezmiy, Xidir Deryaev, Berdi Kerboboev, Qara Seytliev, Qayum Tangriquliev, Nozik Onnatieva, Oraz Yaǵmur, Atajan Toǵon, Ata Atajanov, Ahmet Mammedov, Orazqulı Onnaev sıyaqlı 60 tan aslam jazıwshılar dóretiwshiliginen úlgiler berilgen.
Sonday-aq, Ózbekstan Respublikası Prezidentiniń 2024-jıl 19-fevraldaǵı «Ullı túrkmen shayırı hám oyshılı Maqtımqulı Pıraǵıy tuwılǵan kúniniń 300 jıllıǵın keńnen belgilew haqqında»ǵı qararı tiykarında mámleketimizde bul qutlı áyyyam keńnen belgilendi.
Usı sáne múnásibeti menen ótken jılı Ashxabad qalasında ótkerilgen xalıqaralıq forumda Ózbekstan Respublikası Prezidenti Shavkat Mirziyoev «Maqtımqulı Pıraǵıydıń 300 jıllıǵı» estelik medalı menen sıylıqlandı. Bulardıń barlıǵı xalıqlarımız arasındaǵı doslıq hám tuwısqanlıq qatnasıqları jáne de bekkemlenip atırǵanınan dárek beredi.
Ánjumanda shıǵıp sóylegenler – Ózbekstan Respublikası Prezidentiniń sırtqı siyasat máseleleri boyınsha arnawlı wákili Abdulaziz Komilov, Mámleketlik basqarıw akademiyası rektorı Adham Bekmurodov, Ózbekstan Jazıwshılar awqamınıń baslıǵı, senator Sirojiddin Sayyid, akademik Shuhrat Sirojiddinov, «Jáhán ádebiyatı» jurnalınıń bas redaktorı, Ózbekstanda xızmet kórsetken jurnalist Ahmadjan Meliboev, Ózbekstan kinematografiya agentligi direktorı Shahrat Rizaev, Ózbekstan Ilimler akademiyası vice-prezidenti, professor Bahrom Abduhalimov, filologiya ilimleriniń doktorı Bahodir Karimov, Túrkmen milliy mádeniy orayınıń basshısı, Ózbekstan Respublikası Oliy Majlisi Nızamshılıq palatasınıń deputatı Gúldana Avezdurdieva hám basqalar keyingi jılları Ózbekstan hám Túrkmenstan arasında óz-ara isenim hám jaqın qońsıshılıqqa tiykarlanǵan keń kólemli birge islesiw baylanısları pútkilley jańa basqıshqa kóterilip atırǵanın atap ótti. Bul baǵdarda prezentaciyası ótkerilip atırǵan Gurbanguli Berdimuhamedovtıń «Tafakkur gavhari» («Aqıl-oy gáwharı») kitabı da mine, usınday iygilikli maqsetlerge xızmet etiwi menen úlken áhmiyetke iye ekeni ayrıqsha atap ótildi.

Haqıyqatında da, Gurbanguli Berdimuhamedov – belgili mámleketlik hám siyasiy ǵayratker, sonıń menen birge, jetik izertlewshi ilimpaz, tariyx, filosofiya, ádebiyat, medicina temalarındaǵı onlaǵan salmaqlı shıǵarmalardıń avtorı bolıp esaplanadı. Ol Ózbekstan Ilimler akademiyasınıń húrmetli akademigi etip saylanǵan.
G.Berdimuhamedovtıń házirge shekem «Mádeniyat-xalıqtıń biybaha ǵáziynesi», «Túrkmenlerdiń ruwxıy dúnyası», «Máńgi ápsana», «At – sadıqlıq hám baxıt tımsalı», «Chay – shıpa hám ruwxıy quwatlılıq dáregi», «Baxıtlı ómir densawlıqtan baslanar» sıyaqlı kitapları basıp shıǵarılǵan bolıp, olardıń kópshiligi ózbek kitapqumarlarına da jaqsı tanıs.
Prezentaciya máresiminde atap ótilgenindey, «Tafakkur gavhari» («Aqıl-oy gáwharı») kitabın oqıǵan adam tek ǵana tuwısqan túrkmen eli emes, al barlıq túrkiy xalıqlardıń uqsas tariyxı hám mádeniyatı, ólmes qádiriyatları, ullı pazıyletleri haqqındaǵı qızıqlı maǵlıwmatlarǵa iye boladı.
Bizge belgili, Ózbekstanda túrkmen milletindegi watanlaslarımız da kópshilikti quraydı. Olar hár qıylı tarawlarda nátiyjeli hám pidayı miynet etip, Watanımızdıń rawajlanıwına úles qosıp kelmekte. Kóp milletli elimizde olardıń múnásip turmısta jasawın támiyinlew, qádiriyat hám dástúrlerin qásterlep saqlawǵa úlken itibar qaratılmaqta.
Ilajda shıǵıp sóylegen Túrkmenstannıń Ózbekstandaǵı Ayrıqsha hám tolıq huqıqlı elshisi Shadurdi Meredov Ózbekstan hám Túrkmenstan arasındaǵı mádeniy-gumanitarlıq baylanıslardı jáne de joqarı basqıshqa alıp shıǵıwda áne, usınday mádeniy-aǵartıwshılıq ilajlardıń ornı úlken ekenin atap ótip, bul baǵdarda ámelge asırılıp atırǵan barlıq iygilikli isler ushın Ózbekstan Respublikası Prezidentine, ózbek xalqına shın kewilden minnetdarshılıq bildirdi.

Nazokat USMONOVA,
ÓzAnıń xabarshısı