24-yanvar kúni Tashkent qalasında Ózbekstan Respublikası Oliy Majlisi Senatınıń úshinshi jalpı májilisi óz jumısın dawam ettirdi.

Oǵan Senat, húkimet aǵzaları, ministrlik hám uyımlardıń wákilleri, jergilikli Keńeslerdiń deputatları, Senat janındaǵı Jaslar parlamenti aǵzaları hám ǵalaba xabar qurallarınıń xızmetkerleri qatnastı.
Videokonferencbaylanıs túrinde ótkerilgen jalpı májilisti Ózbekstan Respublikası Oliy Majlisi Senatınıń Baslıǵı Tanzila Norboeva alıp bardı.
Jalpı májilis Senattıń YouTube tarmaǵındaǵı beti arqalı tikkeley sáwlelendirip barıldı.
Jalpı májilistiń ekinshi jumıs kúni senatorlar tárepinen dáslep «Jol háreketi qáwipsizligi sistemasınıń jetilistiriliwi múnásibeti menen Ózbekstan Respublikasınıń Jınayat, Jınayat-processual kodekslerine jáne Ózbekstan Respublikasınıń Hákimshilik juwapkershilik haqqındaǵı kodeksine qosımshalar hám ózgerisler kirgiziw haqqında»ǵı nızam kórip shıǵıldı.
Bul nızam 2024-jıl 16-avgustta ótken shaqırıq Senattıń 55-jalpı májilisinde de kórilgen edi. Dáslepki dodalawlar procesinde senatorlar elimizde keyingi jıllarda jol háreketi qatnasıwshılarınıń tiyisli qaǵıydalarǵa ámel etiw mádeniyatın arttırıw, aydawshılardı tayarlaw hám qayta tayarlaw sistemasın jetilistiriw boyınsha kórilip atırǵan ilajlarǵa qaramastan, respublika aymaǵında jol-transport hádiyseleri júz berip atırǵanı hám sonıń nátiyjesinde puqaralardıń ómirine hám densawlıǵına zıyan jetip atırǵanı haqqında óz pikirlerin bildirgen edi.
Nızamnan jol háreketi qaǵıydalarına ámel etpewdiń unamsız aqıbetleriniń aldın alıwǵa xızmet etetuǵın jańa normalar orın alǵan.
Sonıń ishinde, Jınayat kodeksine tiyisli ózgerisler menen qosımshalar kirgiziw arqalı transport quralların qayta más halında basqarǵanı ushın jınayıy juwapkershilik belgilenbekte. Bunnan tısqarı, Jınayat kodeksine avtomototransport quralı aydawshıların tayarlaw hám qayta tayarlaw, sonday-aq, imtixan ótkeriw hám aydawshılıq gúwalıǵın beriw tártibin buzǵanı, transport quralın basqarıw huqıqınan ayırılǵan adamnıń transport quralın basqarǵanı hám qısılǵan tábiyǵıy gazde, suyıltırılǵan neft gazinde yamasa dizel hám gaz tárizli janılǵı aralaspasında isleytuǵın transport quralınan paydalanıwda qáwipsizlik qaǵıydaların buzǵanı ushın jınayıy juwapkershilik belgilenbekte.
Sonday-aq, Hákimshilik juwapkershilik haqqındaǵı kodekste transportta biyzarılıq, yaǵnıy ayırım aydawshılar tárepinen basqarıw mádeniyatına ámel etpey, transport quralın keskin basqarıw hám basqa da háreketlerde sáwlelendirilgen «agressiv basqarıw», «drift», «shaxmat» tárizinde háreketleniw, jollarda tosqınlıqlardı payda etiw sıyaqlı qaǵıydabuzarlıqlar ushın hákimshilik juwapkershilik belgilenbekte.
Sonday bolsa da, nızamdaǵı ayırım normalar búgingi kúndegi real waqıyalılıqqa jáne ámeldegi nızam hújjetleri talaplarına sáykes kelmegeni sebepli Senattıń 55-jalpı májilisinde Senat aǵzaları hám Nızamshılıq palatası deputatlarınan ibarat kelisim komissiyasın dúziw haqqında qarar qabıl etilgen edi. Bunnan soń Senat tárepinen bildirilgen usınıslar hám narazılıqlar kelisim komissiyası tárepinen kórip shıǵıldı hám barlıq máseleler hár tárepleme dodalanıp, nızam jetilistirildi.
Atap aytqanda, nızam menen járiyma balları esaplanǵan jol háreketi qaǵıydaların buzǵanı ushın hákimshilik jaza qollanıw sıyaqlı juwapkershilik belgilenbekte. Jol háreketi qaǵıydabuzarlıqları boyınsha esaplanatuǵın járiyma balları belgilengen muǵdardan asqanı ushın hákimshilik jaza qollanǵanda aydawshılıq huqıqınan ayırıwdıń eń az muǵdarı altı aydan az bolmawı názerde tutılmaqta.
Bunnan tısqarı, Hákimshilik juwapkershilik haqqındaǵı kodekske kirgizilip atırǵan jańa 1952-statyası da tolıq qayta islendi. Sonıń ishinde, puqaralardıń huqıq qorǵaw uyımları xızmetkerlerin foto, videoǵa túsiriw hám kórinislerdi tarqatıw huqıqı saqlap qalındı. Qorǵaw uyımları xızmetkerleriniń jumısı ústinen jámiyetlik qadaǵalaw tolıq saqlanıp qalmaqta. Aldıńǵı redakciyadan ózgeshe túrde bar nárseni sociallıq tarmaqqa qoyǵanı ushın juwapkershilik belgilenbey atır.

Nızamda tek ǵana xızmetkerlerdiń súwretin olardı abıraysızlandırıwǵa alıp keletuǵın tárizde buzıp tarqatpaw, yaǵnıy xızmetkerdiń háreketleri, sózleri hám júz bergen jaǵdaydı buzbaw, sol maqsette montajlamaw talap etilmekte.
Usı statya sankciyasında belgilengen járiyma muǵdarları da qaytadan kórip shıǵıldı. Sonıń ishinde, qatań belgilengen BEMniń 50 esesi muǵdarındaǵı járiyma 20 eseden 50 esege shekem etip, qatań belgilenetuǵın 15 sutka múddetke hákimshilik qamaqqa alıw 10 sutkaǵa shekem qısqartılmaqta, yaǵnıy jaǵdaydan kelip shıǵıp, sudya bunnan da az múddet belgilewi múmkin.
Sonnan kelip shıǵıp, bul statyada «huqıq qorǵaw uyımları xızmetkerleriniń jámiyetlik qáwipsizlikti támiyinlew boyınsha xızmet wazıypaların orınlap atırǵan waqıtta alınǵan foto – hám (yamasa) videokórinisti olardı abıraysızlandırıwǵa alıp keletuǵın tárizde buzıp tarqatıw, sonıń ishinde, Internet jáhán málimleme tarmaǵında tarqatıw» ushın hákimshilik juwapkershilik belgilenbekte.
Senatorlardıń pikirinshe, bul nızamnıń qabıl etiliwi jol háreketi qatnasıwshılarınıń jollarda háreketleniw mádeniyatın arttırıwǵa, jol háreketi qatnasıwshıları háreket dawamında belgilengen qaǵıydalarǵa ámel etiwin támiyinlewge, jol-transport hádiyseleriniń sanı azayıwına xızmet etedi.
Dodalawdan soń nızam senatorlar tárepinen maqullandı.
Sonday-aq, jalpı májiliste «Banklerdegi amanatlardı qorǵawdıń kepillikleri haqqında»ǵı nızam dadodalandı.
Dodalaw barısında atap ótilgenindey, keyingi jıllarda elimizde qarjı turaqlılıǵın támiyinlew, bank tarawında biznesti júrgiziw ushın báseki ortalıǵın rawajlandırıw, sonday-aq, xalıqaralıq standartlarǵa sáykes keletuǵın huqıqıy tiykarlardı jaratıw boyınsha sistemalı jumıslar alıp barılmaqta.
Atap aytqanda, bank amanatların kepillew sistemasın jetilistiriw respublika bank-qarjı tarawınıń uzaq múddetli turaqlılıǵın támiyinlewge. onı aldıńǵı sırt el tájiriybesi hám xalıqaralıq standartlarǵa muwapıqlastırıwǵa xızmet etedi.
Bul nızamda kepillik beriw hádiysesi hám obyekti, kepillengen amanat, kepillik berilgen amanatlar boyınsha kompensaciya tólew sıyaqlı túsinikler ashıp berilgen.
Nızam menen banklerdegi amanatlardıń qorǵalıwına kepillik beriw tarawındaǵı wákillikli uyım – Amanatlardı kepillew agentliginiń huqıqıy statusı, huqıqları menen minnetlemeleri hám onıń jumıs islew tártibi belgilenbekte.
Sonday-aq, kepillik beriw hádiysesi júz bergende Amanatlardı kepillew agentligi tárepinen bir amanatshıǵa hár bir bankte kepillik beriw obyektiniń qaldıǵı 200 million sum muǵdarında yamasa onnan az bolsa tolıq kólemde kompensaciya tóleniwi belgilep qoyılmaqta.
Bank saplastırılǵanda amanatshılarǵa Agentlik tárepinen kompensaciya tólemin ámelge asırıw dáwiri basqıshpa-basqısh 7 jumıs kúnine shekem azaytılıwı názerde tutılmaqta. Sonıń ishinde, bank saplastırılǵanda kompensaciya tólemi 2025-jıl 1-yanvardan baslap 20 jumıs kúni, 2026-jıl 1-yanvardan 15 jumıs kúni, 2027-jıl 1-yanvardan 7 jumıs kúni dawamında ámelge asırıladı.
Bank bankrotlıqqa ushıraǵan jaǵdayda, amanatshılar qarjılarınıń Agentlik tárepinen qaplap beriliwin esapqa alıp, amanatshılardıń bankten talap etiw huqıqı Agentlikke ótkerilmekte.
Nızamnıń qabıl etiliwi bank sistemasınıń turaqlılıǵın bekkemlew jolı menen xalıq hám isbilermenlerdiń qarjıları pútin saqlanıwı jáne kepillew hádiysesi júz bergende amanatshılarǵa qarjılar qısqa múddetlerde tólep beriliwi támiyinleniwine xızmet etedi.
Dodalawdan soń bul nızam senatorlar tárepinen maqullandı.
Bunnan soń senatorlar tárepinen «Еkologiyalıq ekspertiza, qorshaǵan ortalıqqa tásirdi bahalaw hám strategiyalıq ekologiyalıq bahalaw haqqında»ǵı nızam kórip shıǵıldı.
Elimizde ekologiyalıq qáwipsizlikti támiyinlew, tábiyǵıy resurslardan aqılǵa uǵras paydalanıw, elatlı punktlerdiń sanitariya hám ekologiyalıq jaǵdayın jaqsılaw, ekologiyalıq ekspertizanı jetilistiriw baǵdarında kompleksli ilajlar ámelge asırılmaqta.
Biraq ekologiyalıq ekspertizaǵa baylanıslı ámeldegi huqıqıy hújjetler bólek-bólek, bir qatar normalar silteme xarakterine iye, tarawdı tártipke salıwdıń xalıqaralıq talaplarǵa sáykes mexanizmleri bolsa engizilmegen.

«E-xabar berish» sisteması engizilip, jasaw ornı boyınsha dizimnen ótiwge múrájat etken Ózbekstan Respublikasında turaqlı jasawshı sırt el puqaraları hám puqaralıǵı bolmaǵan shaxslardı dizimnen ótkeriw hám olardıń esabın alıp barıw usı sistema arqalı ámelge asırılıwı belgilenbekte.
Puqaralardıń jasaw ornı boyınsha dizimge qoyılmastan jasaw múddeti 15 kúnnen 10 jumıs kúnine shekem qısqartılıp, puqaralar hám turaq jay iyeleriniń óz waqtında jasaw ornı hám turǵan ornı boyınsha dizimnen ótiw baǵdarındaǵı juwapkershiligi arttırılmaqta.
Pasport sisteması qaǵıydaların buzǵanı ushın járiymalar huqıqbuzarlıqlardıń sociallıq qáwiplilik dárejesinen kelip shıqqan halda optimallastırılıp, olardıń anıq muǵdarı belgilenbekte.
Bunnan tısqarı, nızam menen 18 jasqa tolmaǵan hám 60 jastan asqan puqaralar pasport sisteması qaǵıydaların buzǵanı ushın juwapkershilikke tartılmaytuǵını haqqındaǵı jańa qaǵıyda kirgizilmekte.
Nızamnıń qabıl etiliwi menen xalıqtıń erkin háreketleniwine baylanıslı konstituciyalıq huqıqı támiyinlenedi. Nızam huqıqtı qollanıw ámeliyatında artıqsha byurokratiyanıń hám korrupciyalıq jaǵdaylardıń aldın alıwǵa xızmet etedi.
Dodalawdan soń nızam senatorlar tárepinen maqullandı.
Sonıń menen birge, jalpı májiliste senatorlar tárepinen «Mikroqarjılandırıw jumısınıń jetilistiriliwi múnásibeti menen Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında»ǵı nızam kórip shıǵıldı.
Sońǵı jılları mámleketimizde mikroqarjılandırıw tarawında ámelge asırılıp atırǵan reformalar xalıq hám isbilermenlik subyektlerine kórsetilip atırǵan mikroqarjılay xızmetlerden paydalanıw imkaniyatların arttırıwǵa unamlı tásir kórsetpekte.
Biraq bank emes kredit shólkemleriniń jumısına ornatılǵan ayırım sheklewler, sonıń ishinde, qosımsha qarjı resursların tartıw imkaniyatlarınıń sheklengenligi usı shólkemler tárepinen keń sheńberdegi tutınıwshılarǵa mikroqarjılay xızmetlerdiń kórsetiliwine tosqınlıq etpekte.
Sonıń menen birge, jeterli imkaniyatqa iye mikroqarjı shólkemleriniń kommerciyalıq bank dárejesine basqıshpa-basqısh «ósiwi» ushın imkaniyatlardıń joq ekenligi tarawǵa baylanıslı nızam hújjetlerin qayta kórip shıǵıwdı talap etpekte.
Sonıń ushın «Ózbekstan Respublikasınıń Oraylıq banki haqqında»ǵı, «Bankler hám bank jumısı haqqında»ǵı, «Mámleketlik bajı haqqında»ǵı, «Licenziyalaw, ruqsat beriw hám xabardar etiw tártip-qaǵıydaları haqqında»ǵı hám «Bank emes kredit shólkemleri hám mikroqarjılandırıw jumısı haqqında»ǵı nızamlarǵa qosımsha hám ózgerisler kirgizilmekte.
Nızam menen mikroqarjı shólkemleri hám kommerciyalıq bankler arasında baylanıstırıwshı «shınjır»dı jaratıw, sonday-aq, mikroqarjı shólkemleri ushın qosımsha qarjı resursları, sonıń ishinde, depozit tartıw imkaniyatların keńeytiw maqsetinde bank xızmetlerin ruqsat etilgen shártler tiykarında kórsetiw wákilligine iye bolǵan yuridikalıq tárep – mikroqarjı bank institutın engiziw, mikroqarjı shólkemlerin mikroqarjı banklerine hám mikroqarjı banklerin kommerciyalıq banklerge hám kerisinshe transformaciyalawdıń huqıqıy tiykarları jaratılmaqta.
Nızamda mikroqarjı banki túsinigi, miroqarjı banki ustav kapitalınıń eń az muǵdarı, mikroqarjı banki belgilengen prudencial normativlerge ámel etiwi, kredit shólkemleriniń jumısın ózgertiwdiń ózine tán ózgeshelikleri belgilenbekte.
Sonday-aq, respublika aymaǵında banklerdiń yamasa bank emes kredit shólkemleriniń firma atamaları menen aljastırıp jiberiw dárejesindegi uqsas bolǵan firma atamalarınan paydalanıw qadaǵan etilmekte.
Bul nızamnıń qabıl etiliwi mikroqarjı xızmetleriniń ǵalaba en jayıwına, xalıqtıń keń qatlamalarınıń isbilermenlik baslamaları qollap-quwatlanıwına, onnan aymaqlarda paydalanıw kóleminiń keńeyiwine xızmet etedi.
Dodalawdan soń bul nızam senatorlar tárepinen maqullandı.
Senattıń jalpı májilisinde «Еkonomikalıq jınayatlarǵa qarsı gúresiw sisteması jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında»ǵı nızam da dodalandı.

Mámleketimizde, shaxs, jámiyet hám mámleket máplerin jınayıy kúsh kórsetiwlerden qorǵaw, nızam ústinligi hám qılmıs ushın jaza sózsiz ekenligin támiyinlew principi tiykarında nızamshılıǵımız jetilistirilip, bul baǵdarda keń kólemli reformalar ámelge asırılmaqta.
Onıń logikalıq dawamı sıpatında Ózbekstan Respublikası Prezidentiniń 2024-jıl 16-yanvardaǵı «Jasırın ekonomikaǵa qarsı gúresiw tarawında mámleketlik qadaǵalaw mexanizmlerin jetilistiriw ilajları haqqında»ǵı PP-11-sanlı pármanı menen Bas prokuratura janındaǵı Еkonomikalıq jınayatlarǵa qarsı gúresiw departmentine byudjet nızamshılıǵı buzılıwınıń profilaktikasın támiyinlew, ekonomikalıq jınayatlardı óz waqtında ashıw, hár tárepleme, tolıq hám ádil tergew tarawında qosımsha wazıypalar júklendi.
Prezident pármanı menen Еkonomikalıq jınayatlarǵa qarsı gúresiw departamentine berilgen wazıypalar hám kepillikler nızam menen bekkemlep qoyılmaqta.
Atap aytqanda, Ózbekstanda Respublikası Bas prokuraturası janındaǵı Еkonomikalıq jınayatlarǵa qarsı gúresiw departamentine byudjet haqqındaǵı nızamshılıq buzılıwlarınıń profilaktikasın támiyinlew, ekonomikalıq jınayatlardı óz waqtında ashıw, hár tárepleme, tolıq hám qalıs tergew tarawında qosımsha wazıypalar júklenbekte.
Óz gezeginde, nızam menen Jınayat-processuallıq kodeksi hám “Korrupciyaǵa qarsı gúresiw haqqında”ǵı nızamǵa Departamenttiń jınayat isleri boyınsha tergewdi alıp barıw boyınsha wákillikleri anıqlastırılıwın názerde tutatuǵın ózgeris hám qosımshalar kirgizilmekte.
Sonday-aq, nızamǵa muwapıq Hákimshilik juwapkershilik haqqındaǵı kodeks hám Byudjet kodeksine kirgizilip atırǵan ózgerisler menen Еkonomika hám qarjı ministrligi Mámleketlik qarjını qadaǵalaw uyımlarınıń wákillikleri Еkonomikalıq jınayatlarǵa qarsı gúresiw departamenti Mámleketlik finanslıq qadaǵalaw inspekciyasına júklenbekte.
Dodalaw procesinde senatorlar tárepinen bul nızamnıń turmısta engiziliwi tarawında nızamlılıqtı, nızamlar normalarınıń anıq hám birdey qollanılıwın támiyinlewge, sonday-aq, sud-huqıq tarawında ámelge asırılıp atırǵan reformalardı huqıqıy jaqtan támiyinlewge xızmet etetuǵını atap ótildi.
Nızam senatorlar tárepinen maqullandı.
Oliy Majlis Senatınıń úshinshi jalpı májilisinde “Mámleketlik bajı haqqında”ǵı Ózbekstan Respublikası Nızamına qosımsha hám ózgerisler kirgiziw haqqında”ǵı nızam da kórip shıǵıldı.
Atap ótilgenindey, mámleketimizde energiya resurslarınan aqılǵa uǵras hám nátiyjeli paydalanıwǵa, ekonomikanı jedel rawajlandırıw ushın kerekli bolǵan energiyanıń payda etiliwi hám sarıplanıwın turaqlastırıwǵa hám Ózbekstan aymaǵında sırt el kommerciyalıq shólkemleriniń wákilxanaların akkreditaciyalawdı ápiwayılastırıwǵa qaratılǵan reformalar ámelge asırılmaqta.
Biraq energiya resurslarınan tutınıwshılardıń tólem intazimıy dárejesiniń tómenligi ıssılıq hám elektr energiyası támiynatı kárxanalarınıń qarjı kórsetikshlerine unamsız tásir kórsetpekte. Júzege kelgen debitor qarızdarlıqtı qısqa múddetlerde saplastırıw hám xalıqqa sapalı xızmetler kórsetiw imkaniyatları da sheklenbekte.
Sol sebepli nızam menen ıssılıq hám elektr energiyası támiynatı kárxanaları tárepinen kórsetilgen xızmetler ushın tólemler boyınsha qarızdarlıqtı óndiriw boyınsha sudlarǵa kirgizilgen arza hám shaǵımlardı mámleketlik bajını tólewden azat etiwdi názerde tutıwshı normalar kirgizilmekte.
Bunnan tısqarı, nızamda Investiciyalar, sanaat hám sawda ministrligi tárepinen sırt el kommerciyalıq shólkemleri wákilliklerin akkreditaciya etkenligi ushın mámleketlik bajını óndiriw tártibin jetilistiriwdi názerde tutatuǵın ózgerisler de óz kórinisin tapqan.
Onda sırt el kommerciyalıq shólkemleriniń wákilxanaların Ózbekstan aymaǵında akkreditaciyalaw hám onıń ámel etiw múddetlerin sozıw boyınsha mámleketlik bajını hár bir jıl ushın tóleniwi belgilenbekte.
Nızamnıń qabıl etiliwi energiya resursları tutınıwshıları tárepinen tólem intizamın bekkemlewge xızmet etedi, ıssılıq hám elektr energiyası támiynatı kárxanalarınıń qarjı kórsetkishlerine unamlı tásir kórsetedi.
Dodalawdan soń nızam senatorlar tárepinen maqullandı.

Sonday-aq, senatorlar “Ózbekstan Respublikasınıń ayırım nızam hújjetlerine janlı atqarıw kórkem ónerin jáne de rawajlandırıwǵa qaratılǵan ózgeris hám qosımshalar kirgiziw haqqında”ǵı nızamdı kórip shıqtı.
Bul nızam menen “Tutınıwshılardıń huqıqların qorǵaw haqqında”ǵı, “Mádeniy xızmet hám mádeniyat shólkemleri haqqında”ǵı hám “Reklama haqqında”ǵı nızamlarǵa ózgeris hám qosımshalar kirgizilmekte.
Mádeniyat ministrliginiń janlı atqarıw kórkem ónerin rawajlandırıw, artist, dóretiwshi hám atqarıwshılardı qollap-quwatlawǵa baylanıslı bir qatar wákillikler belgilenbekte.
Sonıń ishinde, mámleketlik mádeniy koncert-tamasha ilajların shólkemlestiriw hám ótkeriwde janlı atqarıw yaki fonogrammadan paydalanıw dárejesin hám usılların belgilew, atqarıwshı tárepinen fonogramma hám avtorlıq dóretpelerinen paydalanıwda ámeldegi nızamshılıqqa ámel etiwin monitoring etiw hám milliy kórkem óner hám mádeniyattıń abırayın arttırıwǵa xızmet etip atırǵan dóretiwshilerdi qollap-quwatlaw boyınsha ilajlardı ámelge asırıw názerde tutılmaqta.
Jańa normalardıń ámeliyatqa engiziliwi muzıka tarawınıń jáne de rawajlanıwına, jańa talantlılardı ashıwǵa, óziniń haqıyqıy janlı dawısı bolǵan qosıqshılar hám sázendelerdiń xızmeti keńnen xoshametleniwine xızmet etedi.
Bunnan tısqarı, nızam menen koncert-tamasha ilajlarınıń baǵdarlamasında atqarıwshılar hám dóretpe avtorları kórsetiliwi shárt ekenligi hám koncert-tamasha ilajı reklamasında fonogrammadan paydalanıw dárejesi haqqındaǵı málimleme ulıwma reklama maydanınıń (kóleminiń) keminde on procentin qurawı haqqındaǵı qosımsha hám ózgerisler kirgizilmekte.
Bul tamashagóylerdiń óz qálewin sanalı túrde qabıl etiwine járdem beredi. Qaysı qosıqshı aytıp atır, kim namasın jazǵan, qay dárejede janlı, qay dárejede fonogramma –hámmesi anıq hám ashıq túrde boladı.
Bul nızamnıń qabıl etiliwi koncert-tamasha ilajların shólkemlestiriw nátiyjeliligin arttırıwǵa, janlı atqarıw kórkem ónerin rawajlandırıwǵa, tutınıwshılardıń huqıqların jáne de bekkemlewge tiykar jaratadı.
Nızam senatorlar tárepinen maqullandı.
Sonıń menen Ózbekstan Respublikası Oliy Majlis Senatınıń úshinshi jalpı májilisiniń ekinshi jumıs kúni juwmaqlandı.

Ózbekstan Respublikası
Oliy Majlisi Senatı
Málimleme xızmeti