Agrosanaattı rawajlandırıw agentliginiń Qaraqalpaqstan Respublikası bólimi qánigeleri menen birgelikte, Taqıyatas rayonı aymaǵında jaylasqan ıssıxanalarda jetistirilip atırǵan ónimler menen birge, júzege kelip atırǵan mashqalalardı úyreniw boyınsha monitoring jumısları alıp barıldı.

Búgingi kúnde Taqıyatas rayonında, jámi 5 ıssıxana óz jumısın alıp barmaqta. Onda pomidor hám qıyar ónimleri egilip, jetistirilmekte.
Atap aytqanda Keneges awıl puqaralar jıyınındaǵı “Taqıyatas agrokomplekteplica” juwapkershiligi sheklengen jámiyetine qaraslı, Koreya texnologiyası tiykarında qurılǵan, ulıwma maydanı 2 gektar maydandı quraytuǵın bul ıssıxanada pomidordıń “Alamina” sortı noyabr ayında egilgen bolıp, tárbiyalaw jumısları alıp barılmaqta.
Íssıxananıń ishki bólimi optimallastırılǵan túrde jılıtılǵan bolıp, bul ónimlerdiń ekologiyalıq jaqtan taza hám sapalı jetistiriliwin támiyinleydi. Jetistirilgen ónimler standartlarǵa muwapıq, tiykarınan ishki bazarlarǵa baǵdarlanadı.
Bunnan tısqarı bul jerde jumıs alıp barıp atırǵan jumısshılar tiykarınan usı máhálledegi hayal-qızlar bolıp, olardıń jumıs islewi ushın jaqsı sharayatlar jaratılǵan. Bul ıssıxanada házirgi waqıtta pomidor nálleri tárbiyalanıp, olar ónim beriw aldında turıptı.
Íssıxana jumısı tek ǵana awıl xojalıǵı ónimlerin jetistiriwdi rawajlandırıwǵa emes, jergilikli xalıqtı jumıs penen támiyinlewge de xızmet etpekte.
Monitoring dawamında bul baǵdardaǵı jumıslardıń barısı úyrenilip, ıssıxananıń jumısların jetilistiriw boyınsha pikir-usınısları tıńlandı.
Túrkiyalı agronom tárepinen ıssıxanada nátiyjeli jumıslar ámelge asırılmaqta.
Monitoring jumısları Taqıyatas rayonındaǵı “Nayman agroteplica” juwapkershiligi sheklengen jámiyeti tárepinen shólkemlestirilgen 8,5 gektarlıq jer maydandı iyelegen ıssıxanada da alıp barıldı. Ol palız ónimlerin jetistiriw boyınsha iri joybarlardan biri bolıp esaplanadı.
Búgingi kúnde ıssıxanada túrkiyalı agronom Bulant Atesh tárepinen 4,5 jıldan berli pomidordan mol ónim alıw nátiyjeli jolǵa qoyılǵan. Bul ıssıxanada hár bir gektardan 100 tonna ónim alıw múmkinshiligi jaratılǵan bolıp, onda zamanagóy texnologiyalar qollanılıp, ekologiyalıq taza hám sapalı palız ónimleri jetistirilmekte.
Íssıxanada pomidorlar dekabr ayınan baslap pisip jetilisip, may ayınıń aqırına shekem terim mapazı dawam etedi. Terilgen pomidorlar Qazaqstan hám Rossiya mámleketlerine eksportqa shıǵarıladı. Sonday-aq, ishki bazarlarǵa da arzan bahada tarqatıladı.Búgingi kúnde ıssıxanada 30 dan aslam hayal-qızdıń bántligi támiyinlengen.

Á.Jiyemuratov,
Qaraqalpaqstan xabar agentligi.