«Isbilermen hayal-qızlar hápteligi» sheńberindegi ilajlar dawam etip, Nókis qalasında “Hamroh” Hayal-qızlar isbilermenligin qollap-quwatlaw kompaniyası hám Ózbekstan Sawda-sanaat palatası tárepinen Qaraqalpaqstan Respublikası Joqarǵı Keńesi hám ATB “Mikrokreditbank” penen birgelikte Isbilermen hayal-qızlardıń dógerek sáwbeti ótkerildi.

Onda qaraqalpaqstanlı 100 ge shamalas hár qıylı baǵdarlarda jumıs islep atırǵan isbilermen hayal-qızlar hám respublikanıń túrli aymaqlarınan kelgen 60 tan aslam isbilermenler qatnastı.
Ilajda erisilgen kelisimler nátiyjesinde 8 baǵdardaǵı memorandumlarǵa qol qoyıldı. Atap aytqanda, Sawda-sanaat palatası hám AKB “Mikrokreditbank” arasında hayal-qızlardıń isbilermenlik xızmetlerin jáne de keńeytiw hám rawajlandırıw, Sawda-sanaat palatası hám Ózbekstanda xızmet kórsetken isbilermen Sh.Norieva arasında Qaraqalpaqstan Respublikasınıń barlıq rayonlarında arnawlı mekteplerdi shólkemlestiriw, Sawda-sanaat palatası hám biznes-trener Sh.Ibragimova arasında Qaraqalpaqstan Respublikasınıń barlıq rayonlarında hayal-qızlar ushın finanslıq sawatlılıqtı arttırıw boyınsha treninglerdi shólkemlestiriw, Buxaralı palshı-isbilermen N.Rwzieva hám Kegeyli rayonınan palshı M.Nurmanova menen óz-ara tájiriybe almasıw, Sawda-sanaat palatası Nawayı wálayatı hám Qaraqalpaqstan Respublikası aymaqlıq basqarmaları arasında ǵálleshilikti rawajlandırıw, qashqadáryalı ónerment usta M.Mannonova hám Ózbekstan Respublikası mayıplar jámiyetiniń Qaraqalpaqstan Respublikası bólimi arasında Mayıplıq úyi tárbiyalanıwshılarınıń islep shıǵarǵan ónimlerin satıp alıp, eksport etiw, Ferǵana wálayatı Rishton rayonınan usta ónerment “Porcelion” JShJ basshısı M.Sattarova hám Berdaq atındaǵı Qaraqalpaq mámleket universiteti kórkem óner fakulteti menen universitet studentlerine ámeliyat maydanın jaratıw boyınsha óz-ara memorandumlarǵa qol qoyıldı.
Sonıń menen birge, ilajda háptelik sheńberinde respublika aymaqlarınan kelip, qaraqalpaqstanlı hayal-qızlarǵa isbilermenlik kónlikpeleri boyınsha master-klasslar ótken intaker isbilermen hayal-qızlarǵa alǵısnamalar tapsırıldı.

Qaraqalpaqstan xabar agentligi.