ϴzbekstanda mádeniyat teoriyası hám tariyxı ilimiy mektebiniń tiykarın salıwshısı akademik Said Shermuxameddovtı burın jaqsı tanımaytuǵın edim.

Burınǵı awqam tarqaǵannan keyingi, alǵaw-dalǵaw jıllar edi. Umıtpasam, 1991-jılı Tashkent qalasındaǵı «Panorama»da bolıp ótken ϴzbekstan Respublikası Muǵallimleriniń quraltayında bayanatımdı jasap, jumıslar menen asıǵıp baratırsam, izimshe birew shıǵıp, 1 minut wakıtıńız bar ma?,- degen dawısqa jalt qarasam, ápiwayı, zıyalı bir insan tur eken.
Assalawma-áleykum, dep qaraqalpaqshalap qos qollap sálemlestim. Ol sálemimdi álik alıp, meni tanıdıńız ba?-dedi. Men qısınǵanımnan, basımdı shayqadım. Soń, ol ózin tanıstırdı. Men filosofiya ilimleriniń doktorı, Said Shermuxammedov bolaman, dedi. Mende ózimdi Qaraqalpaqstan Respublikası Xalıq bilimlendiriw ministri Tatlımurat Atamuratov ekenimdi aytıp, tanımay qalǵanım ushın keshirim soradım.
Sonda Said aǵa álbette durıs, biz burın ushıraspaǵanbız, sonlıqtan da siz tanımaysız dep, sózin arı qaray jalǵastırdı. Mennen táwir-aq, jası úlken bolıwına qaramastan, siz dep sıpayılılıq penen sóylegenine júdá kewlim toldı.
Siz ilim kandidatı ekensiz, dep milliy mámleketshiligimiz ushın ilim-bilimlendiriw tarawın rawajlandırıwda sizdey arnawlı jas kadrlar hawaday zárúr ekenligin aytıp, tezirek, doktorlıq dissertaciyasın qorǵawdı másláhát etkeni, ele esimnen shıqpaydı.
Ózbekstan Respublikası Ilimler akademiyasınıń akademigi, filosofiya ilimleriniń doktorı Said Shermuxammedov mámleketimizde filosofiya ilimine baylanıslı máselelerdi ilimiy izertlewde, sociallıq-gumanitarlıq ilimler baǵdarında joqarı maman kadrlar tayarlawda belsendilik kórsetken insan edi.
Talapshań hám pidayı ustaz óziniń ómiri dawamında jaslarǵa ilim-bilimniń álwan túrli sırların úyretti hám onıń basshılıǵında kóplegen ilim kandidatları hám doktorları ósip jetilisti.
Sonıń ishinde, Qaraqalpaqstanda da Said Shermuhamedovtıń tikkeley basshılıǵında bir qansha ilim doktorları hám ilim kandidatları jetilisip shıqtı. Atap aytqanda, filosofiya ilimlerinin kandidatı, docent, Yusupbay Alimbetov, filosofiya ilimlerinin kandidatı, siyasattanıw ilimleriniń doktorı, professor Almagúl Bayrieva, filosofiya ilimlerinin kandidatı, sociologiya ilimleriniń doktorı, professor Zuxra Seytova, filosofiya ilimlerinin kandidatı, docent Еrgash Asamatdinovlar ózleriniń ilimiy jumısların tabıslı qorǵap shıǵıwǵa miyasar boldı.
Ájayıp insan, Ózbekstan Respublikası Ilimler akademiyasınıń akademigi, filosofiya ilimleriniń doktorı Said Shermuxammedov aramızda joq bolǵanı menen, búgin ol jazıp qaldırǵan biybaha ilimiy miynetler hám tárbiyalap shıǵarǵan shákirt ilimpazlar elimizde ilim tarawınıń rawajlanıwı jolında pidákerlik penen jumıs islemekte.
Álbette, «ustaz-atańday ullı»,-degenindey qaraqalpaqstanlı ilimpazlar da ózleriniń ádiwli ustazı, akademik Said Shermuhamedovtıń kórsetken atalarsha ǵamqorlıǵı hám ustazlıq jol-jobaların hesh qashan umıtpay, «Jańa Ózbekstan»nıń aqıl-zákawatqa tolı, jańa áwladına tıyanaqlı bilim beriwde ayanbastan xızmet ete beredi.

Tatlımurat Atamuratov,
Respublika Ruwxıylıq hám aǵartıwshılıq orayınıń Qaraqalpaqstan bóliminiń baslıǵı,
Ózbekstan Respublikasına xızmet kórsetken jaslar ustazı.
Qaraqalpaqstan xabar agentligi