Xalıqtıń arasına kirip, olardıń sud-huqıq tarawındaǵı múrájatlerine nátiyjeli sheshim tabıw, puqaralar hám isbilermenlerdiń nızamlı huqıqları menen máplerin isenimli qorǵaw ilajların kúsheytiw, jábirkeshlerdiń orınlarda sudpa-sud júriwin toqtatıw jáne “Insan qádiri ushın” principi tiykarında anıq ádil sud sistemasın qáliplestiriw búgingi kúnde sudlardıń áhmiyetli wazıypası bolıp esaplanadı. Usı baǵdarda belgilengen wazıypalardıń orınlanıwın támiyinlew maqsetinde Nókis qalasında ótkerilgen kóshpeli qabıllawda Taqıyatas, Nókis rayonlarınıń hám Nókis qalası turǵınlarınıń sud-huqıq sistemasına tiyisli múrájatleri tıńlandı.

Joqarı sudtıń apparat basshısı A.Xolmaxmatov hám Qaraqalpaqstan Respublikası sudı baslıqları tárepinen 103 puqaranıń sistemaǵa tiyisli múrájatleri qabıl etildi. Sonnan 48 i jınayat, 11 i hákimshilik, 42 si puqaralıq hám ekewi ekonomikalıq sudlawǵa baylanıslı máseleler kórilip, awızsha hám jazba múrájatler qabıl etilgen kóshpeli qabıllawda 52 múrájattıń iyesine tiykarlanǵan huqıqıy túsinikler berildi.
Sol kúnniń ózinde jazasın ótep atırǵan 9 shaxs usınıs hám ótinish xatlar tiykarında jınayat isleri boyınsha sud tárepinen jazanı ótewden múddetinen burın shártli túrde azat etildi. 2 puqaranıń hákimshilik uyım qararı ústinen shaǵım etiw múddeti tiklendi, 5 puqaranıń qarsısına toplanǵan jınayat isi táreplerdiń jarasıwına tiykarlanıp tamamlanıp, olardıń múrájatleri unamlı sheshildi.
Puqaralıq isleri boyınsha sud tárepinen aliment óndiriw haqqındaǵı 11 sud buyrıǵı shıǵarılıp, orınlawǵa qaratıldı. Sonıń menen birge, yuridikalıq áhmiyetke iye bolǵan faktlerdi belgilew boyınsha 4 arza qanaatlandırıldı. Ajırasıw aldında turǵan, jas óspirim perzenti bar bir shańaraq jarastırıldı.
Еkonomikalıq isler boyınsha sud tárepinen 2 isbilermenlik subyektine sud qararları ústinen dawa etiw tártibi túsindirildi.
Kóshpeli qabıllawda múrájatleri sheshilgen 16 puqara Qaraqalpaqstan Respublikası sudınıń jumısları boyınsha Joqarı sud baslıǵı atına jazba alǵıs bildirdi.

Qaraqalpaqstan xabar agentligi