Jaslar isleri agentligi Ámiwdárya rayonlıq bóliminiń baslaması menen Mádeniyat bólimi imaratında «Basshı hám jaslar» ushırasıwı shólkemlestirildi.

Ilajda Ámiwdárya rayonı hákiminiń orınbasarı Nodirbek Kamolov, Ózbekstan Jaslar isleri agentliginiń máhállerdegi jaslar jetekshileriniń jumısın muwapıqlastırıw hám metodologiyalıq támiyinlew bóliminiń bas qánigesi Shahzod Qayumov, agentliktiń Qaraqalpaqstan bóliminiń bas qánigesi Anvar Maratov, Jaslar isleri agentligi rayonlıq bóliminiń baslıǵı Bekzod Wrinboev, awıl hám máhállelerdegi jaslar jetekshileri hám jaslar qatnastı.
Ushırasıw jaslardıń mashqalaların úyreniw hám olarǵa sheshim tabıw ilajların kóriw, jaslardıń múrájatlerin qabıl etiw, olardı hár tárepleme qollap-quwatlaw baǵdarındaǵı ilajlardı islep shıǵıw ushın olardıń usınısların úyreniw maqsetinde shólkemlestirildi.
Rayonda xızmet kórsetiw tarawında jumıs alıp baratuǵın xızmetkerlerdi bir sistemaǵa jámlew maqsetinde Call Center joybarın ámelge asırıw usınısı alǵa qoyıldı. Sonday-aq, IT tarawın rawajlandırıw maqsetinde maman qánigelerdi tartıw, Ózbekstandaǵı IT-parkler menen birge islesiw hám startap joybarların ámelge asırıw sıyaqlı pikirler bildirildi.
Hár bir basshı jaslardıń mashqalalarına sheshim tabıwǵa juwapker, usınday ushırasıwlar jaslardıń baslamaların ámelge asırıwına úlken imkaniyat jaratadı, – dedi Rayon hákiminiń orınbasarı Nodirbek Kamolov.
Ushırasıw dawamında jaslar ózleriniń mashqalaları hám usınısları menen juwapkerlerge múrájat etti. Múrájatler tiykarınan jas isbilermenlerdi qollap-quwatlaw, biznes ushın jer hám jeńillikli kreditler ajıratıw máselelerinde boldı.
Ilaj sheńberinde rayonlıq Kámbaǵallıqtı qısqartıw hám bántlik bólimi tárepinen bos jumıs orınları miynet yarmarkası da shólkemlestirildi. Sonday-aq, rayonlıq Ádillik bólimi jaslardıń huqıqıy máselelerin úyreniw hám olarǵa huqıqıy másláhátler beriw maqsetinde ushırasıw ótkerdi.
Bunday ushırasıwlardıń shólkemlestiriliwi jaslardıń jámiyetlik hám ekonomikalıq belsendiligin arttırıwǵa xızmet etedi.

Qaraqalpaqstan xabar agentligi