Sońǵı jıllarda elimizde Prezidentimizdiń basshılıǵında «Insan qádiri ushın» principi tiykarında kóplegen unamlı isler ámelge ámelge asırılıp kelinbekte.
Ásirese, mámleketimizde medicina tarawın rawajlandırıw arqalı xalqımızdıń salamatlıǵın bekkemlew hám sapalı medicinalıq xızmet kórsetiwdi jańa basqıshqa alıp shıǵıw, sonday-aq, usı jumıslardı jedellestiriwde xalıqaralıq birge islesiwshi shólkemler menen sheriklik tiykarında joybarlardı qollap-quwatlawǵa ayrıqsha itibar qaratılıp atır. Sonıń iishnde, ayrıqsha atap ótiwimiz kerek, Qaraqalpaqstan medicina institutı janında Prezidentimizdiń baslaması menen jańa innovaciyalıq klinika shólkemlestirilgen edi.
Bunıń nátiyjesinde institut zamanagóy hám innovaciyalıq metodlarǵa tiykarlanǵan oqıtıwdı ámelge asırıwda áhmiyetli qádemlerdi tasladı. Atap aytqanda, joqarı dárejedegi medicinalıq diagnostika hám medicinalıq járdem kórsetiw, innovaciyalıq Simulyaciya orayın jaratıw arqalı, búgingi kúni studentler, klinikalıq ordinatorlar, magistrler hám shıpakerler ózleriniń ámeliy is-tájiriybelerin arttırıp kelmekte.
Qaraqalpaqstan medicina institutında sońǵı waqıtları júz berip atırǵan jańalanıw hám ózgerisler menen keń jámiyetshilikti jaqınnan tanıstırıw maqsetinde, Ózbekstan Jurnalistler awqamı Qaraqalpaqstan bólimi hám institut málimleme xızmetiniń shólkemlestiriwi menen respublikamızda jumıs islep atırǵan ǵalaba xabar quralları xızmetkerleri ushın press-tur shólkemlestirildi.
Ótkerilgen ilaj dawamında jurnalistler Qaraqalpaqstan medicina institutınıń innovaciyalıq Simulyaciya orayında bolıp, bul jerdegi studentlerdiń teoriyalıq hám ámeliy sabaqlar ótiwi barısı menen tanıstı.
-Respublikamız medicina tarawına kadrlardı tayarlawda áhmiyetli orın tutatuǵın institutımızda, bul klinika tiykarǵı bilimlendiriw bazası bolıp kelmekte,-deydi instituttıń oqıw isleri boyınsha prorektorı Murat Qurbanazarov.- Sońǵı 5 jıldıń ózinde institutqa 10 mln. dollardan artıq investiciya qarjıları tartıldı. Atap aytqanda, Yaponiya xalıqaralıq birge islesiw agentligi tárepinen ámelge asırılǵan 7,3 mln. dollarlıq joybar sheńberinde institut klinikasına zamanagóy medicinalıq ásbap-úskeneler alıp kelinip, ornatıldı. Bul zamanagóy medicinalıq apparaturalardıń járdeminde búgingi kúni jaslarımız 100 den aslam medicinalıq ilimge baylanıslı ózleriniń ámeliy kónlikpelerin arttırıp kelmekte. Ásirese, studentler ámeliy sabaqlar waqtında nawqaslarǵa tez medicinalıq járdem kórsetiw, erte hám anıq diagnozlar qoyıw tájiriybesine iye bolmaqta.
-Pediatriya fakultetiniń 5-kursında oqıp atırman,-deydi Еzoza Shúkirillaeva.-Házir bizler innovaciyalıq Simulaciya orayında ishki keselikler páni boyınsha ámeliy sabaq ótip atırmız. Ótilip atırǵan bul sabaqlar bizlerdiń medicianlıq pánler boyınsha ámeliy kónlikpemizdi payda etip, bul boyınsha tájiriybemizdi arttırıwda áhmiyetli xızmet atqarmaqta. Bizler institutımızda jaratılǵan bunday qolaylıq hám imkaniyatlarǵa oǵada quwanıshlımız. Bunday sharayatlardı jaratıp bergen elimiz Prezidenti hám institutımız rektoratına ózlerimizdiń minnetdarshılıǵımızdı bildiremiz.
Ilajda jurnalistler tárepinen institut basshıları hám professor-oqıtıwshshılarına bir qatar sorawlar berilip, olarǵa tiyisli juwaplar aldı.
Adilbay Orazov,
Qaraqalpaqstan xabar agentligi sholıwshısı