Húrmetli Prezidentimizdiń tapsırması menen Qaraqalpaqstan Respublikasında puqaralardıń mashqalaların úyreniw hám sheshimin tabıw boyınsha dúzilgen respublikalıq jumısshı topar tárepinen Shımbay rayonında Taxtakópir, Qaraózek, Shımbay, Kegeyli hám Bozataw rayonlarınan kelgen puqaralar ushın múrájatler hám xalıqtı qıynap kiyatırǵan mashqalalarǵa sheshim tabıw boyınsha kóshpeli qabıllaw ótkerildi.

Ótkerilgen qabıllaw dawamında sud-huqıq sistemasına baylanıslı múrájatler, medicinalıq járdem kórsetiw, sociallıq qollap-quwatlaw, bilimlendiriw, bántlik, máhállelerdegi infrastruktura, bank kreditleri hám basqa bir qatar máseleler boyınsha múrájatler bildirildi.
Qabıllawda bildirilgen múrájatlerge óz ornında sheshim tabıw ilajları kórilip, múddet talap etetuǵın máseleler qadaǵalawǵa alındı hám olardı tez arada sheshiw boyınsha tiyisli ilajlar belgilendi.
-Kúyewim Dáryabay Seydullaev bir neshe jıllardan berli awırǵanlıǵı sebepli, úyden kirip shıǵıwınıń ózi múshkil bolıp, mayıplar arbashasına oǵada mútáj edi,-deydi Gújimli mákan puqaralar jıyınınıń turǵını Nazira Reymova.-Mine, búgingi ótkerilgen qabıllawda usı másele boyınsha múrájat etken edim. Meniń bildirgen múrájatım tiyisli taraw basshıları tárepinen úyrenip shıǵılıp, máselem unamlı sheshim taptı. Bunıń ushın usınday qabıllawdı shólkemlestirgen elimiz basshılarına ózimniń sheksiz minnetdarshılıǵımdı bildiremen.
Kóshpeli qabıllawǵa Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev qatnastı.

Adilbay Orazov,
Qaraqalpaqstan xabar agentligi sholıwshısı