2025-jılı joqarı bilimlendiriw shólkemlerin rawajlandırıwdıń baslı baǵdarların hám jumısların jetilistiriw boyınsha usınıslardı islep shıǵıw maqsetinde shólkemlestirilgen Respublikalıq jumısshı topar Qaraqalpaqstan Respublikasındaǵı joqarı oqıw orınlarında úyreniw jumısların basladı.

– Ózbekstan Respublikası Joqarı bilimlendiriw, ilim hám innovaciyalar ministri, jumısshı topar baslıǵı Qońıratbay Sharipov Ájiniyaz atındaǵı Nókis mámleketlik pedagogikalıq institutında aymaqtaǵı joqarı oqıw orınlarınıń basshıları hám Respublikalıq jumısshı topar aǵzaları menen májilis ótkerdi, – deydi NMPI baspasóz xatkeri I.Matekov.
Onda ministr joqarı oqıw orınlarında oqıw procesin jetilistiriw, sanlastırıw hám bilimlendiriwdiń sapasın arttırıw, ilimiy-izertlewlerdiń nátiyjeliligin arttırıw, ilim, bilimlendiriw hám óndiristiń integraciyasın keńeytiw, sociallıq-ruwxıy ortalıqtı salamatlandırıw, student-jaslarda tárbiyalıq jumıslar sistemasın jetilistiriw máseleleri boyınsha pikir alısıldı.
Sonday-aq, student-jaslardıń bos waqıtların mazmunlı shólkemlestiriw, materiallıq-texnikalıq támiynat, oqıw laboratoriyaların zamanagóy ásbap-úskeneler menen támiyinlew, sırt el bilimlendiriw hám izertlew mákemeleri menen birge islesiw baylanısların jolǵa qoyıw boyınsha ámelge asırılıp atırǵan jumıslar hám orın alıp atırǵan mashqalalardıń sheshimi boyınsha usınıslar islep shıǵıw Respublikalıq jumısshı topardıń tiykarǵı maqseti ekenligin atap ótti.
Májilis videokonferencbaylanıs tárizinde ótkerildi. Onda barlıq aymaqlarda úyreniw jumısların alıp barıp atırǵan Respublikalıq jumısshı topar aǵzalarına tiyisli tapsırmalar berildi.
Joqarı oqıw orınlarında Respublikalıq jumısshı topardıń úyreniw jumısları dawam etpekte.

Qaraqalpaqstan xabar agentligi