Jas áwladtıń kámalǵa keliwinde ruwxıylıqtıń, sonıń ishinde, kórkem ádebiyat hám mádeniyattıń tutqan ornı ayrıqsha.
Ruwxıylıqtıń túp negizi-ádebiyat desek asıra aytqan bolmaymız. Sonlıqtan elimizde balalarımızdı jas waqtınan kitap oqıwǵa qızıqtırıw, kitapqumarlıqtı úgit-násiyatlaw maqsetinde, dѳretiwshiler menen ushırasıwlar ѳtkeriw dástúrge aylanǵan.
Shımbay rayonındaǵı mektepke shekemgi hám mektep bilimlendiriwi bѳlimine qaraslı 38-sanlı ulıwma orta bilim beriw mektebinde Qaraqalpaqstan xalıq jazıwshısı, «Doslıq» ordeni iyesi, filologiya ilimleriniń kandidatı, «Qaraqalpaqstan sportı» gazetasınıń redaktorı Allanazar Ábdiev hám shımbaylı jazıwshı Naǵıyma Jańabaevalar menen ushırasıw bolıp ѳtti.
Ótkerilgen ilajǵa muǵallimler, oqıwshılar menen birge, keń jámiyetshilik wákilleri de qatnastı.
Ushırasıwdı mektep direktorı Gáwhar Abdullaeva ashtı hám alıp bardı.
Jazıwshı, jurnalist hám ilimpaz Allanazar Ábdiev ѳziniń dѳretiwshilikke qoyǵan dáslepki qádemleri, basıp ótken ѳmir jolı, shıǵarmalarınıń jazılıw sebepleri hám usılları haqqında ilaj qatnasıwshılarına keń túrde aytıp berdi. Sonday-aq, shıǵarmalarınan úzindiler keltirip, kitaptıń adam ѳmirindegi áhmiyetine toqtadı.
Sonday-aq, ótkerilgen ilajda jazıwshı hám pedagog Naǵıyma Jańabaeva, Shımbay rayonlıq MShHMB bóliminiń sabaqlıqlar boyınsha metodisti Shınar Dáwletnazarovalar da shıǵıp sѳylep, ruwxıylıq hám kitapqumarlıq haqqında túsinikler berdi.
Ilajda qatnasıwshılar tárepinen keshe miymanlarına bir qatar sorawlar berilip, olarǵa juwaplar aldı.
Ilaj sońında mekteptiń kѳrkem ѳnerge qızıǵıwshı háweskerleriniń atqarıwında koncert baǵdarlaması qoyıp berildi.
G.Abdullaeva,
mektep direktorı.
Sh.Dáwletnazarova,
Shımbay rayonlıq MShHMB bóliminiń metodisti.
Qaraqalpaqstan xabar agentligi