Gazeta dáwir aynası. Jańa texnologiyalar ásirinde internet jurnalistika rawajlanıp, xabar tarqatıwshı saytlar, kanallar jumıs alıp barıp atırǵan bolsa da gazeta –jurnallar elege shekem óz oqıwshılarına iye bolıp kelmekte. Demek, ózine jarasa atqaratuǵın funkciyasına iye basılımlar «dáwir aynası» nda xalıqqa jańalıqlardı jetkeriwde óz imkaniyatlarınan kelip shıqqan halda háreket etpekte.

Búgingi kúnde Berdaq atındaǵı Qaraqalpaq mámleketlik universiteti jámááti hám studentleri arasında oqıw hám ilimiy jumısların jáne de bayıtıw maqsetinde 2025-jıl ushın gazeta-jurnallarǵa jazılıw mapazı bolıp ótpekte.
Universitet málimleme-resurs orayı tárepinen oqıw jılı ushın mólsherlengen gazeta-jurnallar dizimi qáliplestirilip, student hám professor-oqıtıwshılar ushın tańlaw imkaniyatı berildi. Onda tiykarǵı itibar ilimiy-texnikalıq, jámiyetlik siyasiy, mádeniy-aǵartıwshılıq temalardaǵı basılımlarǵa qaratılǵan.
Jazılıw mapazında universitettiń prorektorları, matematika, arxitektura fakultetleriniń professor-oqıtıwshıları hám tyutorlar belsendilik kórsetpekte. Jazılıw mapazında professor-oqıtıwshılar tárepinen jazılıw procesiniń áhmiyeti atap ótilip, bul basılımlar tek ǵana oqıw procesinde emes, al studentler hám xızmetkerlerdiń dúnyaǵa kózqarasın keńeytiwde de áhmiyetli qural ekeni atap ótildi.
-Gazeta-jurnallardan jańalıqlardı, maqalalardı oqıw menen birge, ilimiy dereklerden de xabardar bolıp baramız. Jáne bir abzallıq jeri baspasóz tariyxıy arxiv bolıp qaladı. Sol tárepleri menen áhmiyetke iye basılımlarǵa jazılıw imkaniyatlardı beredi. Sonlıqtan da jazılıw mapazında májbúriy emes halda, zárúr basılımlarǵa jazılıw procesi dawam etpekte,-deydi matematika fakulteti dekanınıń orınbasarı J.Nizekeev.
Bul óz gezeginde jıl dawamında barlıq student hám oqıtıwshılarǵa sapalı málimleme dereklerinen nátiyjeli paydalanıw imkaniyatın jaratadı.

Qaraqalpaqstan xabar agentligi