Usı jılı 22-yanvar kúni Prezidenttiń «Еlektrotexnika sanaatın rawajlandırıwdı jańa basqıshqa alıp shıǵıwǵa baylanıslı qosımsha ilajlar haqqında»ǵı PQ-20-sanlı qararı qabıl etildi.
Qararǵa bola, elektrotexnika sanaatın 2025-2027-jılları rawajlandırıw hám jańa basqıshqa alıp shıǵıwdıń tiykarǵı baǵdarları belgilendi.
2025-jıl 1-fevraldan tómendegi qollap-quwatlaw ilajları engiziledi:
– bajıxana aymaǵında qayta islew rejiminde tayarlanǵan ónimlerdi keyingi islep shıǵarıwshılar tárepinen sanaat kooperaciyası tártibinde qayta islew ushın bajıxana aymaǵında qayta islew rejimine jaylastırıwǵa ruqsat beriledi;
– kárxanalardıń rawajlanıw hám izertlew oraylarınıń jumısın jolǵa qoyıw ushın belgilengen tártipte qáliplestiriletuǵın dizimler boyınsha óz mútájlikleri ushın alıp kelinetuǵın, Ózbekstanda islep shıǵarılmaytuǵın laboratoriya úskeneleri hám quralları 2028-jıl 1-fevralǵa shekem bajıxana bajısınan azat etiledi;
– ustav fondında mámleketlik úlesi 50 procentten artıq bolǵan yuridikalıq táreplerdiń hám mámleketlik uyımlardıń hákimshilik imarat-obyektlerin, sonday-aq, sociallıq taraw obyektlerin qurıw boyınsha satıp alıw hújjetlerine tómendegi talaplar kirgiziledi:
– jumıstı bólip alıp islewshiler zárúr tovarlardı Islep shıǵarıwshılar ekosisteması hám Еlektron kooperaciyalıq portaldaǵı jergilikli islep shıǵarıwshılardan satıp aladı;
– zárúr tovarlar portallarda joq bolsa, tastıyıqlawshı maǵlıwmatnamalar tiykarında olardı basqa elektron portallardan satıp alıwǵa ruqsat etiledi;
– Islep shıǵarıwshılar ekosistemasında sawdalar mámleketlik buyırtpashılar hám islep shıǵarıwshılar arasında elektron dúkan tártip-qaǵıydaları tiykarında, shártnama bahası menen baylanıslı sheklewlersiz ótkeriledi, onda ofertalar jergilikli islep shıǵarılǵan tovar haqqındaǵı sertifikat maǵlıwmatları tiykarında qáliplestiriledi.
Qaraqalpaqstan xabar agentligi