2024-jılı 9 mıń 364 jol-transport hádiyseleri júz beriwi aqıbetinde 2 mıń 203 insan qaytıs bolǵan hám 8 mıń 901 insan dene jaraqatın alǵan.

Bul jol-transport hádiyseleriniń júz beriwine tiykarınan puqaralar tárepinen nızamshılıqta belgilengen juwapkershilikti mensinbew, ámeldegi jol háreketi qaǵıydaların jaqsı bilmew sebep bolmaqta.
Senat jalpı májilisinde «Jol háreketi qáwipsizligi sistemasınıń jetilistiriliwi múnásibeti menen Ózbekstan Respublikasınıń Jınayat, Jınayat-processual kodekslerine hám Ózbekstan Respublikasınıń Hákimshilik juwapkershilik haqqındaǵı kodeksine qosımsha hám ózgerisler kirgiziw haqqında»ǵı nızamdı dodalaw procesinde bul tárepler atap ótildi.
Usı másele boyınsha bayanat jasaǵan Senat komitetiniń baslıǵı Qutbiddin Burxonov bul nızam ótken shaqırıqtıń 55-jalpı májilisinde senatorlardıń dodalawına alıp shıǵılǵanın atap ótti. Jol-transport hádiyseleriniń aqıbetinde júzlegen insanlar, sonıń ishinde, jas balalardıń qaytıs bolıp atırǵanı pútkil jámiyetimiz ushın eń awır mashqalalardan biri bolıp esaplanadı. Jol-transport hádiyseleriniń aldın alıw menen birge, puqaralarımızdıń ómiri hám densawlıǵın saqlap qalıw bolsa hár birimizdiń minnetimiz.
-Ótkerilgen úyreniwlerdi tallaw sonı kórsetedi, jol háreketi qaǵıydabuzarlıqları ushın ámeldegi nızam hújjetlerine tásir kórsetiwshi faktorlardıń joqlıǵı hám onıń menen jaza sózsiz ekenligi támiynlenbegeni jol-transport hádiyseleri kóbeyiwiniń tiykarǵı sebeplerinen biri bolmaqta, – dedi Q.Burxonov. – Nızamda bolsa joqarıdaǵı sıyaqlı unamsız aqıbetlerdiń aldın alıwǵa xızmet etetuǵın jańa normalar bar. Atap aytqanda, nızam menen Jınayat, Jınayat-processual hám Hákimshilik juwapkershilik haqqındaǵı kodekslerge jol háreketi qáwipsizligine baylanıslı huqıqbuzarlıqlarǵa qol urǵanı ushın juwapkershilik belgilenbekte.
Nızam jol háreketi qatnasıwshıların jollarda háreketleniw mádeniyatın arttırıwǵa, jol háreketi qatnasıwshıları háreket dawamında belgilengen qaǵıydalarǵa ámel etiwin támiyinlewge, jol-transport hádiyseleriniń sanı azayıwına xızmet etedi.

Norgul Abduraimova,
Nosir Haydarov (súwret), ÓzA