Nókis qalasınan ótetuǵın “Doslıq” kanalın rekonstrukciyalaw, yaǵnıy belgilengen bóleginde betonlaw jumısları juwmaqlandı,-dep xabar bermekte Suw xojalıǵı ministrligi málimleme xızmetiniń baslıǵı Ǵ.Atajanov.

Joybar sheńberinde bas jumıstı bólip alıp islewshi kárxana “Kegeylimaxsussuvpudrat” JShJ tárepinen kanaldıń 4 kilometrlik bólegi rekonstrukciyalanıwı belgilengen.
Joybardı ámelge asırıwdan kútilip atırǵan tiykarǵı nátiyje, Nókis qalasında suw turizmin rawajlandırıw, suw sportı menen shuǵıllanıwı ushın qolaylı sharayatlardı jaratıw hám kanal boyın xalıqtıń dem alıw ornına aylandırıw bolıp esaplanadı.
Bul kanal Qaraqalpaqstan Respublikasındaǵı eń iri kanallardıń biri bolıp, uzınlıǵı 25,2 kilometrdi quraydı. Kanal arqalı Nókis qalası, Taxtakópir, Qaraózek, Kegeyli, Shımbay hám tolıq emes túrde Nókis rayonlarınıń egislik maydanlarına suw jetkeriledi.
“Doslıq” kanalında betonlaw jumısları juwmaqlanǵanan keyin, keyingi kúnlerde usı kanalǵa sekundına 100 metr kub.qa shekem suw berilip, respublikamızdıń arqa rayonlarında shor juwıw ilajları shólkemleskenlik penen dawam etpekte.
Maǵlıwmat ushın, Qaraqalpaqstan Respublikasında 2025-jıldıń shor juwıw máwsimi dawamında 171 mıń gektar maydanda shor juwıw, 63 mıń gektar maydanda ǵálle maydanlarında hám xalıqtıń qıytaq jerlerinde suwǵarıw jumısların alıp barıw rejelestirilgen. Bul ilajlar ushın derekten jámi 1,4 mlrd. metr kub suw alıw limiti ajıratılǵan. Alınǵan suw muǵdarları menen kúnine ortasha 2 mıń gektar jer suwǵarılǵan bolsa, máwsim basında jámi 87 mıń gektar maydanda shor juwıw jumısları alıp barıldı.

Qaraqalpaqstan xabar agentligi