Sud-huqıq máseleleri boyınsha kóshpeli qabıllawlar dawam etpekte.

Shımbay rayonında da Kegeyli, Bozataw, Shımbay, Qaraózek hám Taxtakópir rayonlarınan kelgen puqaralar ushın respublikalıq sektor jáne ministrlikler menen shólkemlerdiń basshıları tárepinen múrájatler hám xalıqtı qıynap kiyatırǵan mashqalalarǵa sheshim tabıw boyınsha kóshpeli qabıllaw ótkerildi.
Qabıllawda Ózbekstan Respublikası Joqarı sudı baslıǵınıń orınbasarı Sh.Polvonov hám Joqarı sudtıń apparat baslıǵı A.Xolmaxmatovlar puqaralardıń sud sistemasına baylanıslı múrájatlerin tıńladı.
Qabıllawda sud basshılarına 55 puqara óz máseleleri menen múrájat etken bolsa, sonnan 28 i jınayat, 2 i hákimshilik, 20 sı puqaralıq, 5 i ekonomikalıq sudlawǵa baylanıslı máselelerdi quradı.
Awız-eki hám jazba túrde múrájatler qabıllanǵan kóshpeli qabıllaw barısında 29 múrájat iyesine tiykarlanǵan huqıqıy túsinikler berildi.
Usı kúni usınısnamalar hám bildirilgen ótinishlerge muwapıq jazasın ótep atırǵan 10 shaxs jınayat isleri boyınsha sudlar tárepinen jazanı ótewden múddetinen aldın shártli túrde azat etildi. Sonday-aq, 2 puqaranıń qarsısına toplanǵan jınayat isi hám bir puqaranıń qarsısına toplanǵan hákimshilik huqıqbuzarlıq boyınsha isi táreplerdiń óz-ara jarasqanlıǵı múnásibeti menen is júrgiziwden toqtatıldı. Al, 1 sudlanıwshınıń qarsısına qollanılǵan qamaq tárizindegi bas sharası biykar etilip, sud zalınan qamaqtan azat etildi, 1 puqaranıń transport quralın basqarıw huqıqınan ayırıw jazası qısqartılıp, olardıń múrájatleri qanaatlandırıldı.
Puqaralıq isleri boyınsha sudlar tárepinen 4 puqaranıń aliment óndiriwge baylanıslı múrájatleri tiykarında sud buyrıǵı shıǵarılıp, orınlawǵa qaratıldı. Sonday-aq, 6 puqaranıń miynet haqısın óndiriwge baylanıslı múrájatı qanaatlandırıldı. Sonıń menen birge, 2 isbilermenlik subyektine sud qararları ústinen shaǵım etiw tártibi túsindirildi.
Kóshpeli qabıllawda múrájatleri unamlı sheshimin tapqan 9 puqara Ózbekstan Respublikası Prezidentine sud-huqıq tarawında alıp barılıp atırǵan ádil hám durıs siyasatı ushın minnetdarshılıq bildirip, jazba túrde alǵısnamalar usındı.

Qaraqalpaqstan xabar agentligi.