Karmelo Inguangez Maltanıń Ózbekstandaǵı birinshi elshisi etip tayınlandı. Bul haqqında Sırtqı isler ministri Baxtiyor Saidov óziniń «Telegram» kanalında málim etti, dep xabar beredi xs.uz.

Xabarǵa bola, 23-yanvar kúni Maltanıń mámleketimizdegi birinshi elshisi etip tayınlanǵan Karmelo Inguanez Sırtqı isler ministri Baxtiyor Saidovqa isenim jarlıǵın tapsırdı.
Sonday-aq, ilaj kún tártibinen eki tárepleme qatnasıqlardıń huqıqıy tiykarların bekkemlew, parlamentler arasında doslıq toparların shólkemlestiriw, ekonomikalıq birge islesiwdi rawajlandırıw, turizmdi qollap-quwatlaw, bilimlendiriw tarawında qatnasıqlardı jedellestiriw hám mámleketler arasındaǵı qatnasıqlardı joqarılatıwǵa qaratılǵan basqa baǵdarlardı da dodalaw orın alǵan.
«Sóylesiwler waqtında diplomatiyalıq pasport iyeleri ushın óz-ara vizasız rejim engiziw haqqında kelisimge qol qoydıq», – dep jazǵan Ózbekstan SIM basshısı.
Esletip ótemiz, Ózbekstannıń Malta menen diplomatiyalıq qatnasıqları 1993-jıl 25-fevralda ornatılǵan. Eki mámleket te ótken 32 jıl ishinde óz-ara siyasiy, ekonomikalıq hám mádeniy-gumanitarlıq tarawlarda tıǵız birge islesip kelmekte.

Qaraqalpaqstan xabar agentligi