Ózbekstan Respublikası Prezidenti Administraciyası tárepinen dúzilgen arnawlı jumısshı topar wákili B.Pirimbetov Bozataw rayonında bolıp, tiyisli taraw basshıları menen ushırastı.

B.Pirimbetov sońınan Qusxanataw awıl puqaralar jıyınında bolıp, bul jerde máhálle jetiligi tárepinen ámelge asırılǵan jumıslardıń barısı menen tanıstı. Ilajda aymaqtaǵı isbilermenlik penen shuǵıllanıp atırǵan puqaralar menen sóylesip, olardıń ushırasıp atırǵan mashqalaların tıńladı. Sonday-aq, aymaqta jaslardıń sport penen shuǵıllanıwı ushın jaratılǵan sharayatlar menen tanısıp, jıyın basshılarınıń sporttı keńnen en jaydırıw boyınsha alıp barıp atırǵan jumısları tuwralı pikirlerin tıńladı.
Sońınan arnawlı jumısshı topar wákili B.Pirimbetov Bozataw poselkalıq puqaralar jıyınına barıp, bul jerde máhálle jetiligi tárepinen xalıqtıń mashqalaların úyreniw hám sheshiw, jumıssızlıq hám kámbaǵallıqtı qısqartıw, kámbaǵallıqtan abadan turmısqa qaray baǵdarlaması tiykarında ámelge asırılıp atırǵan jumıslar menen jaqınnan tanıstı.
Aymaq turǵınları menen sáwbetlesip, olardıń ushırasıp atırǵan mashqalaların tıńladı.
Házirgi kúnleri respublikamızdıń barlıq aymaqlarında Ózbekstan Respublikası Prezidenti Administraciyası tárepinen dúzilgen arnawlı jumısshı topar aǵzaları belgilengen keste tiykarında úyreniw jumısların alıp barmaqta.

Adilbay Orazov,
Qaraqalpaqstan xabar agentligi sholıwshısı