2024-jıldıń 20-iyun kúni Ózbekstan Respublikası Prezidenti basshılıǵında bolıp ótken videoselektor májilisinde injenerlik tarawındaǵı Joqarı oqıw orınların jetilistiriw, injener kadrlardı tayarlaw sistemasındaǵı áhmiyetli máseleler hám «tarmaq -kárxana -joqarı oqıw ornı» tiykarında hár bir joqarı oqıw ornına birge islesiwshi sanaat kárxanaları belgilengen edi. Sonıń menen birge, barlıq injenerlik joqarı oqıw orınları birge islesiwshi kárxanalarda kafedra filialların ashıw hám dual bilimlendiriwdi jolǵa qoyıw, studentlerdiń ámeliyatı hám pitkeriw kursındaǵı oqıwı tolıq birge islesiwshi kárxanalarda shólkemlestiriledi – dep belgilep berilgen edi.

Usı tiykarda Nawayı mámleketlik kánshilik hám texnologiyalar universiteti janındaǵı Nókis kánshilik institutı tárepinen institutta jolǵa qoyılǵan dual tálim, birge islesiwshi kárxanalarda kafedra filiallarınıń ashılıwı hám ol jerde teoriyalıq bilimler menen birge laboratoriyalıq sabaqlar ótiliwi, studentlerdiń sanaat kárxanalarındaǵı processleri menen tanıstırıw maqsetinde, ǵalaba xabar quralları xızmetkerleri ushın press-tur shólkemlestirildi.
Ótkerilgen press-tur dawamında jurnalistler institut penen birge islesip kiyatırǵan «Ústirt geofizika ekspediciyası», «Polimer Nókis» «Nókis elektroapparat», Ózbekstan milliy metrologiya institutı Qaraqalpaqstan filialında kafedra filiallarında ashılǵan hám dual bilimlendiriw baǵdarında alıp barılıp atırǵan jumıslar menen tanıstı.
-Keleshekte student-jaslar óndiris kárxanalarında óz orınlarına iye bolıw, sırt el tájiriybeleri tiykarında bilimlendiriwdiń sapasın jaqsılawǵa qaratılǵan bir qatar wazıypalardı biz ózimizge belgilep alǵanbız,-deydi institut direktorınıń oqıw isleri boyınsha orınbasarı Daniyar Jumamuratov.-Sonlıqtan institutımız studentleri 2-kurs dáwirinen baslap-aq, respublikamızda jaylasqan bir qatar óndiris kárxanalarında oqıw-ámeliyatın birge alıp barmaqta. Keleshekte bilimlendiriwdiń sapasın jaqsılaw, oqıw menen ámeliyattı birlestirip, Ózbekstannıń sociallıq-ekonomikalıq rawajlanıwı ushın ózlerimizdiń úlesimizdi qosıwdı maqset etkenbiz.

Adilbay Orazov,
Qaraqalpaqstan xabar agentligi sholıwshısı