Ózbekstan Respublikası Qorǵanıw ministrligi hám Oraylıq Aziya xalıqaralıq institutı arasında birge islesiw memorandumına qol qoyıldı.

Nızamshılıq hújjetlerinde belgilengen tártipte óz jumısı baǵdarında gózlengen nátiyjelerge erisiw maqsetine xızmet etiwshi bul kelisimge bola, tárepler óz-ara paydalı qatnasıqtı qollap-quwatlaw hám rawajlandırıw, wákilligi sheńberinde birgelikte ilajlar ótkeriw, sonıń ishinde, málimleme-analitikalıq jumıstı jáne de jetilistiriw jolında jumıs alıp baradı.
Sheriklik sheńberinde dúnyada júz berip atırǵan sırtqı hám ishki siyasiy, sonıń menen birge, sociallıq-ekonomikalıq processlerdiń tiykarǵı tendenciyaların hár tárepleme tereń úyreniw, ámeliy pikir-usınıslar islep shıǵıw, sonday-aq, mámlekettiń milliy, áskeriy qáwipsizligin támiyinlew, mámlekettiń qorǵanıw qábiletin arttırıw, qorǵanıw hám áskeriy qurılıs tarawlarında mámleketlik siyasattı sapalı ámelge asırıwǵa baylanıslı xalıqaralıq tájiriybeni ózlestiriw baǵdarındaǵı háreketlerdi muwapıqlastırıw da názerde tutılǵan.
Qol qoyılǵan hújjette tarawǵa baylanıslı milliy hám xalıqaralıq dárejedegi ilimiy-metodikalıq, ámeliy konferenciyalardı shólkemlestiriw hám ótkeriw, xalıqaralıq qatnasıqlar boyınsha ekspertler hám tar sheńberdegi qánigelerdiń óz-ara tájiriybe almasıwın ámelge asırıw, xızmetkerlerdiń mamanlıǵın arttırıw, olardı qayta tayarlaw, ámeliyatlar ótkeriw tártibi sáwlelengen.

Ǵ.Xonnazarov, ÓzA