23-yanvar kúni Tashkent qalasında Ózbekstan Respublikası Oliy Majlisi Senatınıń úshinshi jalpı májilisi óz jumısın basladı.

Onda Senat, húkimet aǵzaları, ministrlik hám uyımlardıń wákilleri, jergilikli Keńeslerdiń deputatları, Senat janındaǵı Jaslar parlamenti aǵzaları hám ǵalaba xabar qurallarınıń xızmetkerleri qatnastı.
Videokonferencbaylanıs túrinde ótkerilgen jalpı májilisti Ózbekstan Respublikası Oliy Majlisi Senatınıń Baslıǵı Tanzila Norboeva alıp bardı.
Jalpı májilis Senattıń YouTube tarmaǵındaǵı beti arqalı tikkeley sáwlelendirip barıldı.
Senattıń úshinshi jalpı májilisinde dáslep «Investiciyalar hám investiciya jumısı haqqında»ǵı nızam kórip shıǵıldı.
Bul nızam investiciya jumısı tarawındaǵı birden-bir mámleketlik siyasattı, sonıń ishinde, tikkeley investiciyalardı ámelge asırıw waqtında payda bolatuǵın qatnasıqlardı tártipke saladı.
Nızamda mámleketimizde qolaylı investiciyalar ortalıǵın jaratıw, tikkeley investiciyalardı jedel tartıw, sonday-aq, jergilikli hám sırt el investorları hám isbilermenlerdiń huqıqların kepillew názerde tutılǵan.
Sonday-aq, kámbaǵallıqtı qısqartıw, xalıqtıń densawlıǵın saqlaw, sapalı bilimlendiriw, tábiyǵıy resurslardan aqılǵa uǵras paydalanılıwın támiyinlew, qayta islew hám óndiris imkaniyatın arttırıw, «jasıl» ekonomikanı rawajlandırıw, sonday-aq, insan huqıqları qorǵalıwın támiyinlew de usı nızamnıń maqsetlerinen bolıp esaplanadı.
Bunnan tısqarı, investiciyalar hám investiciya jumısına baylanıslı tiykarǵı túsinikler, principler hám maqsetler belgilenbekte. Atap aytqanda, investiciyalaw erkinligi, ashıq-aydınlıqtı támiyinlew, biznesti basqarıw erkinligi hám qarjılardı erkin basqarıwǵa baylanıslı kepillikler belgilenbekte.
Nızam menen investiciya kólemine bola kishi, orta, iri, strategiyalıq investiciyalıq joybarlarǵa jeńillikler beriw názerde tutılmaqta.
Sonday-aq, investiciyalardı qollap-quwatlaw ilajları hám jeńillikler sheńberi keńeytilmekte. Sırt el investiciyalarınıń qatnasıwındaǵı kárxanada ustav fondın sırt el investiciyaların shólkemlestiriwi kerek ekenligi haqqındaǵı muǵdar 15 procentten 10 procentke túsirilmekte.
Nızamnıń qabıl etiliwi jergilikli hám sırt el isbilermenlerine «bir ayna» sisteması arqalı wákillikli mámleketlik uyımǵa investiciya usınısları menen múrájat etiw imkaniyatların jaratıwǵa, sonday-aq, olarǵa ádalatlı hám teń huqıqlı túrde qatnasta bolıwǵa, olardıń kepillikleri, huqıqları hám minnetlemelerin mámleket tárepinen múnásip qollap-quwatlawǵa xızmet etedi.
Dodalaw sońında nızam senatorlar tárepinen maqullandı.
Bunnan soń «Azıq-awqat qáwipsizligi haqqında»ǵı nızam kórip shıǵıldı.
Bul nızamnıń maqseti azıq-awqat qáwipsizligi tarawındaǵı qatnasıqlardı tártipke salıwdan ibarat.
Nızam normaları xalıqtıń azıqlıq zattıń bahasına iye bolǵan azıq-awqat ónimleri menen qáwipsiz awqatlanıwın támiyinlewge, nátiyjeli bazar mexanizmlerin qáliplestiriw sonıń menen birge azıq-awqat ónimleri hám shiyki zatın islep shıǵarıwǵa qollanıladı.
Nızamda azıq-awqat qáwipsizligi tarawındaǵı mámleketlik siyasattıń tiykarǵı baǵdarları belgilengen.
Atap aytqanda, azıq-awqat ónimlerin paydalanıwdıń minimal normalarına muwapıq azıq-awqat ónimleri hám shiyki zatınıń aylanba rezervin qáliplestiriw hám xalıqtı sociallıq áhmiyetke iye tiykarǵı túrdegi azıq-awqat ónimleri menen jeterli muǵdarda hám úzliksiz támiyinlew imkaniyatların keńeytiw usılardıń qatarına kiredi.
Bunnan tısqarı, mámleket azıq-awqat ónimleriniń nızamshılıq hújjetlerinde belgilengen sanitariyalıq, veterinariyalıq, veterinariya-sanitariyalıq, fitosanitariyalıq qaǵıydaları hám normalarına muwapıq islep shıǵarılıwın qollap-quwatlaydı.
Sırtqı ekonomikalıq jumıstı jedellestiriw, sonday-aq, sociallıq áhmiyetke iye tiykarǵı túrdegi azıq-awqat ónimleriniń eksportı hám importı arasındaǵı optimal turaqlılıqtı saqlaw da azıq-awqat qáwipsizligi tarawındaǵı mámleketlik siyasattıń baǵdarlarınan biri bolıp esaplanadı.
Awıl xojalıǵı ministrligi azıq-awqat qáwipsizligin támiyinlew tarawında wákillikli mámleketlik uyım sıpatında belgilenbekte.

Oǵan respublika atqarıw hákimiyatı uyımları hám jergilikli atqarıw hákimiyatı uyımlarınıń azıq-awqat qáwipsizligi tarawındaǵı jumısın muwapıqlastırıw, azıq-awqat ónimleri hám shiyki zatın islep shıǵarıw menen baylanıslı jumıstı qollap-quwatlaw boyınsha usınıslar tayarlaw, azıq-awqat qáwipsizligine unamsız tásir etiwshi faktorlardı úyreniw tiykarında azıq-awqat ónimlerin islep shıǵarıw processlerin jetilistiriw hám rawajlandırıwǵa baylanıslı qısqa, orta hám uzaq múddetli strategiyalardı islep shıǵıw sıyaqlı bir qatar wákillikler berilmekte.
Sonday-aq, nızamda azıq-awqat jetispewshiligine jol qoymaw boyınsha mámleket tárepinen qanday ilajlar kóriliwi, azıq-awqat balansın qáliplestiriw, tutınıwshılardıń hám xojalıq júrgiziwshi subyektlerdiń azıq-awqat qáwipsizligi tarawındaǵı huqıqları menen minnetlemeleri belgilep qoyılmaqta.
Bul nızam mámleketimizde azıq-awqat qáwipsizligi tarawındaǵı qatnasıqlardı tártipke salıwshı normalardı birden-bir hújjetke unifikaciyalaw hám sistemalastırıw, bul tarawdaǵı qatnasıqlardı kompleksli huqıqıy tártipke salıwǵa xızmet etedi.
Dodalaw sońında nızam senatorlar tárepinen maqullandı.
Usınıń menen Ózbekstan Respublikası Oliy Majlisi Senatınıń úshinshi jalpı májilisiniń birinshi jumıs kúni juwmaqlandı.

Ózbekstan Respublikası
Oliy Majlisi Senatınıń
Málimleme xızmeti