Kuala-Lumpur qalasında Ózbekstan Respublikası Еkonomika hám qarjı ministrligi delegaciyası Malayziya Еkonomika ministriniń orınbasarı Hajja Xanifa Hajar Taib penen ushırasıw ótkerdi.

Onda Malayziyanıń turaqlı ekonomikalıq ósiwdi támiyinlewdegi tabıslı tájiriybesi tolıq dodalandı.
Sóylesiw dawamında tárepler óz-ara birge islesiw imkaniyatların dodaladı. Atap aytqanda, «jasıl» ekonomika, qayta tikleniwshi energiya dáreklerinen paydalanıwdı keńeytiw, klimat ózgeriwine beyimlesiw strategiyaların islep shıǵıw hám uglerod emissiyaların qısqartıw boyınsha birgeliktegi joybarlardı ámelge asırıw máselesi kórip shıǵıldı.
Sonday-aq, texnologiyalıq innovaciyalar boyınsha ilimiy-izertlewlerdi ámeliy ekonomikaǵa qollanıw, sanlı texnologiyalardı rawajlandırıw hám texnologiyalar transferin qollap-quwatlaw hám miynet bazarınıń rawajlanıwın inabatqa alǵan halda jas qánigelerdi tayarlaw baǵdarında bilim hám tájiriybe almasıw ushın seminar hám treningler shólkemlestiriw boyınsha pikir alısıldı.
Ushırasıw sońında tárepler ekonomikalıq birge islesiwdi keńeytiw maqsetinde turaqlı sóylesiwdi dawam ettiriw hám eki tárep ushın óz-ara paydalı bolǵan baǵdarlardaǵı imkaniyatlar turaqlı úyrenip barılıwına kelisip alındı.
Bunday birge islesiw Ózbekstannıń 2030-jılǵa mólsherlengen «jasıl» ekonomika strategiyasın ámelge asırıwda xalıqaralıq tájiriybe hám resurslardan nátiyjeli paydalanıw ushın áhmiyetli platforma bolıp xızmet etedi.

Nasiba ZIYoDULLAEVA,
ÓzAnıń xabarshısı