Ózbekstan Sawda-sanaat palatası hám intaker isbilermen hayal-qızlar birgelikte Qaraqalpaqstan Respublikasında Mámleketimiz basshısı tárepinen kámbaǵallıqtı qısqartıw boyınsha belgilep berilgen wazıypalardıń orınlanıwın támiyinlew, isbilermenlik etiwdi qálewshi hayal-qızlarǵa finanslıq bilim beriw, olardı kishi-texnologiyalar menen támiyinlew, tájiriybeli isbilermenler menen pikir almasıw imkaniyatın jaratıw, kooperaciya tiykarında xalıqtı bánt etiw maqsetinde dáslepki márte “Isbilermen hayal-qızlar hápteligi”ne start berildi.
Háptelik sheńberinde gúlshilik, zergerlik, gúlalshılıq, toqımashılıq, tigiwshilik, konditer ónimlerin pisiriw, kesteshilik, pal hárreshilik sıyaqlı 15 ten aslam baǵdarda master-klasslar shólkemlestiriledi.
Sonıń menen birge, Ózbekstanda xızmet kórsetken isbilermen Sharapat Norieva isbilermenlik jumısındaǵı tabısqa erisiw sırları menen ortaqlasadı. Nókis qalası hám Shomanay rayonlarında qarjı máseleleri boyınsha belgili ekspert Shohida Ibragimova tárepinen biznes treningler ótkeriledi. Sonday-aq, Xojeli rayonı hákimligi menen birgelikte “Isbilermen hayal-qızlar baǵı” jaratıladı.
Respublikamızdıń hár qıylı aymaqlarınan kelgen isbilermen hayal-qızlardıń arasında tıǵız baylanıs jaratıladı.
Háptelik ilajlarında 60 tan aslam intaker isbilermen hayal-qızlar ózleriniń tájiriybelerin ortaqlasıw, master-klasslar arqalı bizneske dáslepki qádem qoyıp atırǵanlarǵa biznes sırların úyretiw hám olarǵa biznes joybarların ámelge asırıw ushın dáslepki zárúr úskeneler hám shiyki zatlar menen támiyinlew maqsetinde Qaraqalpaqstan Respublikasına keldi.
Háptelik sheńberinde respublikamızdıń barlıq aymaqlarınan 250 den aslam isbilermen hám 600 den aslam biznesin baslaw niyetindegi hayal-qızlar, imkaniyatı sheklengen xalıq qatlamı, járdemge mútáj hayal-qızlardıń qatnasıwı kútilmekte.

Qaraqalpaqstan xabar agentligi