Sud-huqıq sistemasındaǵı máseleler boyınsha múrájatlerge nátiyjeli sheshim tabıw, puqaralar menen isbilermenlerdiń nızamlı huqıqları menen máplerin isenimli qorǵaw ilajların kúsheytiw, adamlardıń orınlarda sudpa-sud áwere bolıp júriwin toqtatıw hám “Insan qádiri ushın” principi tiykarında anıq ádil sud sistemasın qáliplestiriw, onıń jumısların xalıq mápi hám insan qádirin nátiyjeli qorǵawǵa baǵdarlaw boyınsha belgilengen wazıypalardıń orınlanıwın támiyinlew maqsetinde Qanlıkól rayonında ótkerilgen kóshpeli qabıllawda Xojeli, Shomanay, Qońırat, Moynaq, Qanlıkól rayonlarınan kelgen puqaralardıń sud-huqıq sistemasına tiyisli múrájatleri tıńlandi.

Ózbekstan Respublikası Joqarı sudı baslıǵınıń orınbasarı Sh.Polvonov hám Ózbekstan Respublikası Joqarı sudınıń apparat basshısı A.Xolmaxmatovlar tárepinen 68 puqaranıń sistemaǵa tiyisli múrájatleri tıńlandı. Sonnan 23 i jınayat, 7 i hákimshilik, 35 i puqaralıq, 3 i ekonomikalıq sudlawǵa tiyisli máselelerdi quradı.
Awızsha hám jazba múrájatler qabıl etilgen usı kóshpeli qabıllawda 36 múrájattıń iyesine tiykarlanǵan huqıqıy túsinikler berildi.
Sol kúni jazasın ótep atırǵan 5 shaxs usınıs hám ótinish xatları tiykarında jınayat isleri boyınsha sud tárepinen jazanı ótewden múddetinen aldın shártli túrde azat etildi. 6 qamaqtaǵı shaxstıń ótelmegen erkinen ayırıw jazası basqa túrdegi jeńillew jazaǵa almastırıldı. 1 puqaranıń qarsısına toplanǵan jınayat isi táreplerdiń jarasıwına tiykarlanıp tamamlanıp, olardıń múrájatleri de unamlı sheshildi.
Puqaralıq isleri boyınsha sud tárepinen aliment óndiriw tuwralı 7 sud buyrıǵı shıǵarılıp, orınlawǵa qaratıldı. Sonıń menen birge, yuridikalıq áhmiyetke iye bolǵan faktlerdi belgilew boyınsha 4 arza qanaatlandırıldı. Ajırasıw aldında turǵan, eki jas óspirim perzenti bar bir shańaraq jarastırıldı.
Еkonomikalıq isler boyınsha sud tárepinen 3 isbilermenlik subyektine sud qararları ústinen dawa etiw tártibi túsindirildi.
Kóshpeli qabıllawda múrájatlerine sheshim tabılǵan 6 puqara Qaraqalpaqstan Respublikası sudınıń jumısları boyınsha Joqarı sud baslıǵına jazba alǵıs bildirdi.

Qaraqalpaqstan xabar agentligi.