Sońǵı jılları elimiz jaslarınıń xalıqaralıq sport jarıslarında qolǵa kirgizip atırǵan tabısları, jas áwlad wákilleriniń sportqa degen qızıǵıwshılıǵın arttırıp, olardı alǵa qaray umtıldırmaqta.
Atap aytqanda, ózbekstanlı jas futbolshılardıń Aziya chempionatı, kubogi hám jáhán chempionatlarında, Olimpiada oyınlarında kórsetken oyınları, Еldor Shomuradov, Abduqodir Husanov, Abbosbek Fayzullaev hám basqa futbolshılarımızdıń Evropanıń eń kúshli klublarına ótiwi jaslarımızdıń futbolǵa bolǵan qızıǵıwshılıǵın arttırǵanına gúman joq.
Ásirese, Ózbekstan Respublikası Prezidentiniń 2023-jıl 3-noyabrdegi «Futbol-bilimlendiriw mákemeleri tarmaǵın keńeytiw hám xalıqaralıq standartlarǵa juwap beretuǵın futbol infrastrukturasın rawajlandırıw ilajları haqqında»ǵı hám 2023-jıl 25-dekabrdegi «2024-2026-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı qararları elimizde jaslar arasında futboldıń jáne de keńnen en jayıwına áhmiyetli tiykar bolmaqta.
Sonıń ishinde, 2024-jılı joqarıdaǵı atı atalǵan Prezident qararları tiykarında, Nókis qalasında jaylasqan Qaraqalpaqstan Respublikası futbol akademiyasına «Ústyurt trans» juwapkershiligi sheklengen jámiyeti tárepinen 4 mlrd 385 mln sumlıq kapital ońlaw hám «Turan» stadionına «Nasaf mega stroy» juwapkershiligi sheklengen jámiyeti qurılısshıları tárepinen 26 mlrd sumlıq kapital rekonstrukciya jumısları júrgizildi.
Ózbekstan Jurnalistler awqamınıń Qaraqalpaqstan bólimi hám Qaraqalpaqstan Respublikası Sport ministrligi tárepinen respublikamızda jumıs alıp barıp atırǵan ǵalaba xabar quralları xızmetkerleri ushın ótkerilgen press-turda jurnalistler usı sport obyektlerinde islengen hám islenip atırǵan jumıslardıń barısı menen tanıstı.
-«Turan» stadionınıń qurılısı sport obyektlerin qurıw boyınsha úlken tájiriybege iye bolǵan «Nasaf mega stroy» , Qaraqalpaqstan Respublikası futbol akademiyası qurılısı «Ústyurt trans» juwapkershiligi sheklengen jámiyetlerine isenip tapsırıldı,-deydi Qaraqalpaqstan Respublikası Sport ministrliginiń investiciya baǵdarlamaları hám infrastrukturalar boyınsha bas qánigesi Rustem Daniyarov.-Sonnan futbol akademiyasınıń imaratında qurılıs ońlaw jumısları tolıq juwmaqlanıp, 2024-jıldıń dekabr ayında xalıq iygiligi ushın paydalanıwǵa tapsırıldı.
Al, «Turan» stadionında bolsa, 26 mlrd sumlıq kapital rekonstrukciya jumısları alıp barılmaqta. Nesip etse, 2025-jıldıń aqırında qaraqalpaqstanlı futbolshılar da FIFA talaplarına tolıq juwap beretuǵın zamanagóy stadionǵa iye boladı. Házirgi kúnleri bul obyektte konstrukciyalıq jumıslar alıp barılmaqta hám bul jumıslarǵa 80 nen aslam qurılısshılar qatnaspaqta.
– Qaraqalpaqstan Respublikası futbol akademiyasında búgingi kúni 154 oqıwshı tálim almaqta,-deydi akademiya direktorı Damir Iskenderov.-Oqıw dárgayına júrgizilgen kapital ońlaw jumıslarınan soń, bul jerde oqıwshılar hám trenerler ushın kóplegen qolaylı sharayatlar jaratıp berildi. Atap aytqanda, imarattıń áynek-qapıları, edenleri jańadan ózgertilip, asxana, monshaxana, kitapxana hám sheshiniw bólmeleri zamanagóy túrge endi. Bul jerde tálim alıp atırǵan oqıwshılar jataqxana, arnawlı kiyim-kenshekler hám 3 mezgil ıssı awqat penen támiyinlengen.Mektebimiz tárbiyalanıwshıları Ózbekstan kóleminde ótkeriletuǵın hár qıylı jarıslarǵa qatnasıp, olarda sıylı orınlardı iyelep kelmekte. Atap aytqanda, ótken jılı 2008-jılı tuwılǵan jas futbolshılarımız futbol Akademiyaları komandaları arasında ótkerilgen chempionatta qola medalın jeńip alıwǵa miyasar bolǵan bolsa, qalǵan jas kategoriyasındaǵı futbolshılarımız da jarıslarda múnásip túrde qatnaspaqta. Olardıń arasınan ósip jetilisken Bahadır Izbasqanov, Samandar Muratbaev, Asılbek Atashevtay jaslarımız búgingi kúni Tashkenttiń «Bunyodkor», «Olimpik Mobiuz», Surxandáryanıń «Surxon» klublarında ózleriniń sheberliklerin kórsetpekte. Bul jaslarımız arasınan keleshekte Abduqodir Husanov, Abbosbek Fayzullaev, Еldor Shomuradovtay pútkil dúnyaǵa belgili futbolshılar ósip jetilisetuǵınlıǵına tolıq isenemen.

Haqıyqatında da, elimizde Prezidentimiz tárepinen jaslarımızǵa jaratılıp atırǵan keń imkaniyat hám qolaylıqlar nátiyjesinde mámleketimiz jasları sońǵı jılları xalıqaralıq arenalarda kóplegen jeńislerdi qolǵa kirgizbekte. Aldaǵı waqıtları usınday jaslar arasında qaraqalpaqstanlı jas futbolshılardı da kórsek ájeplenbeymiz. Sebebi, bunıń ushın respublikamızda bekkem tiykar jaratılmaqta.

Adilbay Orazov, Qaraqalpaqstan xabar agentligi sholıwshısı