Zamanagóy texnologiyalar istiń ónimdarlıǵın arttırıp, qolaylıqlar jaratarı anıq. Bul baǵdardaǵı ilajlar nasos stanciyalarında da ámelge asırılıp, zamanagóy jańa texnologiyalar engizilmekte.

Nókis rayonı nasos stanciyasında eski agregatlardıń ornına zamanagóy energiya únemleytuǵın nasos agregatların ornatıw boyınsha kórgizbeli seminar ótkerildi.
Ilajda sózge shıqqanlar mámleketimiz basshısı tárepinen 2025-jıldıń «Qorshaǵan ortalıqtı qorǵaw hám «jasıl» ekonomika» jılı dep járiyalanǵanı hám bul baǵdarda awıl xojalıǵı tarawında belgilengen wazıypalardı orınlawǵa baylanıslı nasos agregatların energiya únemlewge ótkeriw baǵdarındaǵı jumıslardı keńnen engiziw zárúr ekenligi atap ótildi.
Sonday-aq, fermer xojalıqlarına egislik atız shetlerin tazalaw, texnikalardı egiske tayarlaw, shor juwıw jumısların óz waqtında ámelge asırıw boyınsha kórsetpeler berilip, bul jumıslardı orınlawda fermerlerge jaqqınnan járdem beriw boyınsha taraw basshılarına anıq tapsırmalar berildi.
Ilaj qatnasıwshıları nasos agregatları hám quyash panelleri, olardıń islew processleri menen jaqınnan tanıstı. Onda engizilip atırǵan jańa texnologiyalar hám tarawda ámelge asırılıp atırǵan jumıslar boyınsha maǵlıwmatlar berildi.

Qaraqalpaqstan xabar agentligi