Xalıqtı isbilermenlikke tartıw, olardı qosımsha dáramat tabıwǵa baǵdarlaw búgingi kúnde hákim járdemshileriniń tiykarǵı wazıypası esaplanadı. Beruniy rayonı Xorezm MPJ hákim járdemshisi J. Eraliev tárepinen aymaqta isbilermenlik islew tilegin bildirgen puqaralarǵa jeńillikli kredit alıwda járdemler kórsetilip kelinbekte. Máhálle aymaǵındaǵı bos turǵan imaratta tawıq baǵıwdı jolǵa qoyǵan D.Ataniyazova 15 mln sum kredit alıp, qusshılıqtı rawajlandırıwǵa úles qospaqta. Nátiyjede ózi hám shańaraq aǵzaların jumıs penen bánt etip, qosımsha dáramat tabıwdı basladı.
Sonday-aq, óz úyiniń paydalanbay bos turǵan bóleginen avtomobillerge texnikalıq hám servis xızmetin kórsetiwdi shólkemlestirgen B.Qurbanbaevqa 33 mln sum kredit ajıratıldı. Bul bolsa óneri arqalı isbilermenlik jumısın rawajlandırıwǵa tiykar jaratadı.
Ótken 2024-jılda máhállede shańaraqlıq baǵdarlama tiykarında 58 puqaraǵa 1 mlrd 221 mln sum jeńillikli kreditler berilgen bolsa, 17 isbilermenge 1 mlrd 700 mln sum girewsiz kreditler, jámi 2 mlrd 921 mln sumlıq kreditler ajıratılǵan. Sonday-aq, 18 puqaraǵa subsidiya tiykarında ásbap-úskeneler berilgen. Aymaqtıń social-ekonomikalıq jaqtan rawajlanıwın jánede kóteriw ushın máhálle jetiligi tárepinen alıp barılıp atırǵan jumıslar óz nátiyjesin berip, bıyılǵı jılı da tabıslarǵa erisiliwi kútilmekte.
Qaraqalpaqstan xabar agentligi