Milletleraralıq tatıwlıq hám keńpeyillikti támiyinlew eldiń tınıshlıǵı hám paraxatshılıǵında áhmiyetli orın tutadı. Bul baǵdarda mámleketimizde milletleraralıq doslıq ortalıqtı hám kóp milletli úlken birden-bir shańaraq sezimin bekkemlew boyınsha keń kólemli jumıslar ámelge asırılmaqta. Atap aytqanda, Milletleraralıq qatnasıqlar hám sırt mámleketler menen doslıq qatnasıqları komiteti mámleketimizdegi 157 milliy mádeniy oray, sırt eldegi 98 watanlaslar jámiyeti menen birge islesip kelmekte.

Mámleket aymaǵında jasaytuǵın túrli millet hám xalıqlardıń mádeniyatı, tili, úrp-ádeti hám dástúrlerin saqlap qalıw, rawajlandırıw maqsetinde Qaraqalpaqstan Respublikası, wálayatlar hám Tashkent qalasında «Doslıq úyleri» shólkemlestirildi, milliy mádeniy oraylardıń jumısı materiallıq qollap-quwatlandı. Ózbekstandaǵı milliy mádeniy oraylar sırt eldegi watanlaslardıń milliy dóretiwshiligin rawajlandırıw, jaslar arasında ilimiy hám mádeniy qatnasıqlardı keńeytiwge qaratılǵan túrli baǵdarlar hám seminarlar ótkermekte.
Bul haqqında Nızamshılıq palatasınıń Demokratiyalıq institutlar hám puqaralıq jámiyetin rawajlandırıw máseleleri komiteti tárepinen ótkerilgen tıńlawda aytıp ótildi. Onda Milletleraralıq qatnasıqlar hám sırt mámleketler menen doslıq qatnasıqları komitetiniń «Milliy mádeniy oraylar hám sırt eldegi watanlaslar menen alıp barılıp atırǵan jumıslar haqqında»ǵı málimlemesi tıńlandı.
Tıńlawda deputatlar sırt eldegi watanlaslar menen baylanıslı jumıslardıń nátiyjeliligin arttırıw, milliy mádeniy oraylar menen birge islesiw, dúnya kóleminde Ózbekstannıń mádeniy miyrasın tanıtıw boyınsha bir qatar usınıslar berdi.

M.Komilova, ÓzA