Senat jalpı májilisinde mámleketimiz rawajlanıwınıń búgingi basqıshındaǵı áhmiyetli wazıypalar, «Ózbekstan-2030» strategiyasındaǵı maqsetlerge itibar qaratıldı.

Senat Baslıǵı bul máselede pikir bildirip, Prezidentimizdiń parlament aǵzaları menen ushırasıwlarında bergen kórsetpelerinen kelip shıǵıp, Senattıń usı jıldıń birinshi yarımına mólsherlengen jumıs rejesi qáliplestirilgenin atap ótti.
– Jumısımızdıń eń tiykarǵı baǵdarları boyınsha 100 den artıq ilajlar hám olardı ámelge asırıwdıń anıq mexanizmleri belgilendi,-dedi Tanzila Norboeva. – Bárinen burın, jańa Konstituciyaǵa muwapıq, Senattıń nızam dóretiwshiligindegi roli hám intakerligi kúsheytiledi. Jámiyetlik hám mámleketlik turmısqa baylanıslı áhmiyetli máselelerdi sheshiw boyınsha nızamshılıq usınısları alǵa qoyıladı. Onda, ekologiya, qorshaǵan ortalıqtı qorǵaw, klimat ózgeriwi, shańaraq, xalıqtıń salamatlıǵın saqlaw, balalardı zıyanlı informaciyadan qorǵaw, turizm, qurılıs tarawların rawajlandırıw máselelerine ayrıqsha itibar qaratıladı. Parlament qadaǵalawı sheńberinde 50 ge shamalas áhmiyetli sociallıq-ekonomikalıq máseleler boyınsha úyreniw hám tallawlar ótkeriw rejelestirilgen.
Tiykarǵı itibar aymaqlarǵa, yaǵnıy wálayat, rayon, qala, máhállelerdi sociallıq-ekonomikalıq rawajlandırıw, investiciya, isbilermenlik, kámbaǵallıqtı qısqartıw, bántlik (ásirese, rásmiy emes bántlikti qısqartıw), bilimlendiriw, medicina, sociallıq qorǵaw, insan huqıqları, korrupciyaǵa qarsı gúresiw, sırtqı hám ishki miynet migraciyasın tártipke salıw menen baylanıslı áhmiyetli máselelerge qaratıladı.
Onda, tek ǵana qadaǵalaw menen sheklenilmeytuǵını, úyreniwler, tallawlar arqalı tiykarlanǵan usınıslar islep shıǵılıwı atap ótildi. Mashqalalardı sheshiwde ministrlik, uyım hám jergilikli mámleketlik hákimiyat uyımlarına járdemlesip barıladı.
Hár bir aymaqta birewden jumısı úlgili jolǵa qoyılatuǵın rayon (qala)lıq keńes belgilep alındı. Olardıń tájiriybesi tiykarında jıldıń aqırına shekem barlıq rayon (qala)lıq keńeslerdiń jumısın úlgili shólkemlestiriw ilajları kóriledi.
Ulıwma alǵanda, jergilikli keńeslerdiń jumısın 2030-jılǵa shekem rawajlandırıw Koncepciyası qabıl etiledi hám bul baǵdardaǵı barlıq jumıslar usı hújjetke súyengen halda sistemalı dawam ettiriledi.
Áhmiyetli baǵdarlardan biri bolǵan xalıqaralıq baylanıslardı jáne de jedellestiriw, parlamentleraralıq birge islesiw kólemin keńeytiw baǵdarında da 20 ǵa shamalas ilaj belgilep alındı.
Senat Baslıǵı Parlamentleraralıq awqamnıń 150-yubiley Assambleyası aprel ayında elimizde ótkeriliwi, bunday global kólemdegi ilaj birinshi márte ótkeriliwin esapqa alıp onı hár tárepleme joqarı dárejede ótkeriw ushın barlıq zárúr ilajlar kórilip atırǵanın aytıp ótti. Joqarı dárejede erisilgen kelisimlerdiń orınlanıwında parlamenttiń belsene qatnasıwı hám qadaǵalawın támiyinlew boyınsha sırt ellerdiń nızam shıǵarıwshı uyımları menen birge islesiw de izbe-iz dawam ettiriledi. Eki tárepleme birge islesiw baylanısların rawajlandırıw, investiciyalardı tartıw, milliy ónimler eksportınıń kólemin arttırıw hám turizm jumısına járdemlesiw baǵdarında mámleketimizdiń sırt ellerdegi 36 diplomatiyalıq wákilxana basshısınıń esabatları tıńlanadı.

Norgul Abduraimova,
Nosir Haydarov (súwret),
ÓzA