Aldın xabar bergenimizdey, Qaraqalpaqstan Respublikası Ministrler Keńesiniń Baslıǵı F.Еrmanov basshılıǵındaǵı delegaciya aǵzaları Qıtay mámleketiniń iri kompaniya wákilleri menen ushırasıwlar ótkerdi.

Sapar dawamında Xubey provinciyasınıń Uxan qalasında a “CSADI” Co., Ltd. (Central-South Architectural Design Institute) kompaniyasınıń jumısı menen jaqınnan tanıstı hám Nókis qalasında 40 kóp qabatlı turaq jay imaratların qurıw boyınsha sóylesiwler alıp bardı. Sonday-aq, sóylesiwlerde Xojeli rayonında “Jaslar sociallıq-ekonomikalıq orayı”n shólkemlestiriw boyınsha kelisimge qol qoyıwǵa kelisip alındı.
Sonıń menen bir qatarda, delegaciyamız aǵzaları Shandun provinciyasınıń Czinan qalasında bolıp, túrli investiciyalıq kompaniya hám shólkemler menen sóylesiwler alıp bardı. Atap aytqanda, “Shuifa Agriculture Group” Co.,Ltd kompaniyası wákilleri menen ushırasıwda “Paxta sanaatınıń kórgizbe kompleksi” joybarın ámelge asırıwǵa baylanıslı máseleler dodalandı. Sóylesiwler dawamında paxta sanaatı kompleksin shólkemlestiriw boyınsha kelisimlerge qol qoyıldı.
Bunnan soń Czıbo qalasındaǵı Densawlıqtı saqlaw tarawında joqarı texnologiyalar orayı bolǵan “Shıtsyao medicina orayı”na bardı hám ol jerde delegaciya aǵzaları tiykarınan kem támiyinlengen shańaraqlar ushın diagnoz qoyıw arqalı keselliklerdiń aldın alıw (profilaktika) boyınsha jaratılǵan sistema menen tanıstı. Bul bolsa, óz gezeginde keselliklerdiń aldın alıw, dári-dármaqlarǵa jumsalıwshı qárejetlerdi azaytıw imkaniyatın beredi.
Delegaciyamız aǵzaları Yunnan provinciyasında bolıp, kótere sawda hám túrli tovarlardı jetkerip beriw menen shuǵıllanıwshı “Yiwu Basmalla” Co.Ltd” kompaniyası, avtomobiller ushın komplektlewshi bólekler hám shinalar islep shıǵarıwshı “Teng Long” Co. ltd kompaniyasınıń jumısı menen jaqınnan tanıstı hám Ózbekstan ónimlerin Dali qalasına jetkerip beriw, avtomobiller ushın awısıq bólekler hám shinalardı Qaraqalpaqstanda islep shıǵarıwdı ózlestiriw máselesin kórip shıqtı.
Sapardıń gezektegi kúni delegaciyamız aǵzalarınıń qatnasıwında Qıtaydıń 80 nen aslam iri kompaniyalarınıń qatnasıwında biznes forum shólkemlestirildi. Ushırasıwlarda sawda-ekonomikalıq hám investiciyalıq birge islesiw, sonday-aq, Qaraqalpaqstanda jańa birgeliktegi investiciyalıq joybarlardı jolǵa qoyıw máselelerine toqtap ótildi.
Bunnan soń Qıtaydıń 20 dan aslam kompaniyaları menen V2V sóylesiwleri ótkerildi.

Qaraqalpaqstan xabar agentligi