Qaraqalpaqstan Respublikası Ministrler Keńesiniń Korrupciyaǵa qarsı Ishki qadaǵalaw bóliminiń baslıǵı Batır Matmuratov Ámiwdárya rayonında bolıp, ayrıqsha jaǵdaylardıń aldın alıw baǵdarında ámelge asırılıp atırǵan jumıslar menen tanıstı.

Ámiwdárya rayonı Ayrıqsha jaǵdaylar bóliminde rayon hákimi S. Xwjametov, hákim orınbasarları, bir qatar tiyisli shólkemler hám máhálleler juwapkerleriniń qatnasıwında gúzgi-qısqı máwsimnen zıyansız ótiw, ayrıqsha jaǵdaylardıń, ásirese, gaz iyisinen záhárleniwdiń aldın alıw, elektr energiyası, tábiyǵıy gazden paydalanıwda qáwipsizlik qaǵıydalarına ámel etiw boyınsha májilis bolıp ótti.
Onda ayrıqsha jaǵdaylardıń aldın alıw, órt qáwipsizligin támiyinlew baǵdarında ámelge asırılıwı kerek bolǵan áhmiyetli wazıypalar haqqında sóz etildi. Máhállelerdiń juwapkerleri tárepinen shańaraqlarǵa úyme-úy kirgen halda ısıtıw qurılmalarınan durıs paydalanıw, morılardı tazalaw, záhárli gaz iyisiniń insan ómiri ushın qáwipli ekenin boyınsha túsindiriw, úgit-násiyatlaw jumısların jáne de kúsheytiw kerekligi atap ótildi. Ilajda záhárli iyis gazinen záhárleniwge alıp keletuǵın sebepler hám aqıbetler haqqında sóz etildi.
Ilaj dawamında máhállelerdegi xalıqtıń turaq jayları kózden ótkerilip, tiyisli tapsırmalar berildi.

Qaraqalpaqstan xabar agentligi