Senattıń jalpı májilisi óz jumısı dawam ettirmekte. Májilisti kiris sózi menen ashqan Senat Baslıǵı Tanzila Norboeva ótken jıl mámleketimiz ushın tabıslı jıl bolǵanın atap ótti.

Prezidentimizdiń basshılıǵındaǵı sistemalı reformalar arqalı jámiyetlik hám mámleketlik turmıstıń barlıq tarawlarında turaqlı rawajlanıw pátleri támiyinlenip, úlken nátiyjeler qolǵa kirgizildi.
-Bıyılǵı jılı da úlken shekler alǵanbız, – dedi T.Norboeva. – «Ózbekstan – 2030» strategiyasın «Qorshaǵan ortalıqtı qorǵaw hám «jasıl» ekonomika jılı»nda ámelge asırıw boyınsha mámleketlik baǵdarlamada bıyılǵı jıldaǵı maqset hám wazıypalarımız anıq kóringen. 2025-jılı mámlekettiń rawajlanıwınıń tiykarǵı processleri belgilendi. Bular – máhálle, kóshelerde jasıllıq dárejesin arttırıw, ekologiyalıq jaqtan qolaylı hám abadan jasaw ortalıǵın qáliplestiriw, xalıqtıń salamatlıǵın jaqsılaw, ekologiyalıq turmıs tárizin qáliplestiriw, tábiyǵıy resurslardı únemlew hám olardan aqılǵa urǵas paydalanıw, ekologiyalıq turaqlılıqtı támiyinlew, ósimlik hám xaywanat dúnyasın saqlaw, kóbeytiw hám keyingi áwladqa jetkeriw. Sonıń menen birge, «jasıl ekonomika» principlerin keńnen engiziw, ekonomikanı klimat ózgeriwine beyimlestiriw, respublika energobalansında qayta tikleniwshi energiyanıń úlesin arttırıw, ekonomika tarmaqları hám sociallıq tarawda zamanagóy energoúnemlewshi texnologiyalardı keńnen qollanıw, ekologiyalıq turaqlılıqqa baǵdarlanǵan aymaqlar hám tarmaqlararalıq muwapıqlastırıwdı támiyinlewge itibar kúsheytiledi.
Belgilengen hár bir maqset hám wazıypa Global Turaqlı rawajlanıw maqsetleri (TRM) menen teńdey ekenin ayrıqsha atap ótiw zárúr.
– Mámleketlik baǵdarlama joybarı eki hápte dawamında keń jámiyetshilik, sonıń ishinde, Senat komitetlerinde de dodalandı. Bir qatar áhmiyetli usınıslar bildirildi. Endi Baǵdarlamaǵa qol qoyılıwı menen onıń orınlanıwında hámmemiz – parlament, húkimet, jergilikli keńesler bir bolıp háreket etiwimiz, belgilengen hár bir wazıypa sózsiz, óz waqtında hám sapalı orınlanıwın támiyinlewimiz zárúr, – dedi Senat Baslıǵı.

Norgul Abduraimova,
Nosir Haydarov (súwret),
ÓzA