Densawlıqtı saqlaw ministrligi hám Jáhán densawlıqtı saqlaw shólkemi tárepinen Rakqa qarsı gúresiw milliy rejesin islep shıǵıwǵa baǵıshlanǵan «Ózbekstan onkologiyalıq xızmet kórsetiwdiń jańa basqıshına qaray: milliy rejeniń baslanıwı» boyınsha májilis ótkerildi.

Onda elimiz wákilleri hám JDSSh ekspertleri qatnasıp, Rakqa qarsı gúresiw milliy rejesin islep shıǵıw máseleleri, bul baǵdardaǵı xalıqaralıq tájiriybe, rawajlanǵan mámleketlerdiń jetiskenlikleri hám kemshilikleri dodalandı. Mámleketimizde rak keselligin erte anıqlaw hám nátiyjeli emlew ilajların kóriw-taraw wákilleriniń itibar orayında ekenin aytıp ótiwimiz kerek. 2030-jılǵa shekem 30-69 jastaǵı xalıq arasında onkologiyalıq keselliklerdi profilaktikalıq tekseriwler arqalı erte basqıshta anıqlap, 5 jıllıq ómir dawamlıǵı kórsetkishlerin 2 esege arttırıw, 1-jılǵa shekem ólim dárejesin 2 esege azaytıw, onkologiyalıq kesellikke shatılǵan nawqaslardı emlewge tolıq qamtıp alıw maqset etilgen. Sonday-aq, mámleketimiz basshısınıń tiyisli qararına tiykarlanıp 2025-2030-jıllarda Jatır moynı hám kókirek bezi ragin qadaǵalaw mámleketlik baǵdarlaması ámelge asırılıwı názerde tutılǵan.
Ilajda atap ótiliwinshe, Ózbekstan rak keselligine qarsı gúresiwde áhmiyetli qádemler taslamaqta. Oǵan baylanıslı milliy reje bolsa erisilgen nátiyjelerdi bekkemlew ushın tiykar boladı.
Tiykarǵı maqset keseliktiń profilaktikası, onı erte anıqlaw, emlew, reabilitaciyalaw hám palliavitlik járdemdi óz waqtında shólkemlestiriw hám onkologiyalıq patalogiyalar registrin júrgiziw arqalı xalıqtıń salamatlıǵın qorǵaw, nawqaslanıw hám ólim dárejesin tómenletiw hám nawqaslardıń ómirin jaqsılawǵa erisiw, delinedi DSM baspasóz xızmeti xabarında.
Xalıqaralıq ekspertler elimizde bul tarawdaǵı jetiskenlikler hám talaplardı bahalap, bul baǵdardaǵı jumıslardı turaqlı ámelge asırıw boyınsha usınısların berdi.

ÓzA