Ózbekstan Respublikası Bas ministriniń orınbasarı – Еkonomika hám qarjı ministri Jamshid Qwchqorov hám Evropa tikleniw hám rawajlanıw bankiniń (ETRB) qarjı institutları boyınsha basqarıwshı direktorı Fransis Malij basshılıǵındaǵı delegaciya wákilleri arasında ushırasıw bolıp ótti.

Onda tárepler óz-ara birge islesiw nátiyjeleri hám gezektegi rejeler haqqında sóylesti. Atap aytqanda, onda ótken dáwirde birgelikte ámelge asırılǵan joybarlar hám olardıń nátiyjeleri, keleshektegi birge islesiw baǵdarları, sonday-aq, Ózbekstanda ekonomikalıq turaqlılıq hám sociallıq abadanlıqtı arttırıwǵa qaratılǵan tiykarǵı baslamalardı dodalawǵa itibar qaratıldı.
Sóylesiw waqtında mámleket qatnasıwındaǵı banklerdi menshiklestiriw processlerin jedellestiriw, jeke menshik sektordı qollap-quwatlaw, mámleketlik kárxanalardı rawajlandırıw hám transformaciyalaw sıyaqlı baǵdarlar dodalandı. Sonday-aq, bilimlendiriw tarawında mektepler hám studentler jataqxanaların shólkemlestiriw joybarları, mámleketlik-jeke menshik sheriklik tiykarında ámelge asırılıp atırǵan baslamalar haqqında pikir alısıldı.
«Jasıl» ósiwdi támiyinlew, sonıń ishinde, energiya nátiyjeliligin arttırıw hám «jasıl» texnologiyalardı keńnen engiziw, kishi hám orta isbilermenlikti rawajlandırıw hám jáne de qollap-quwatlaw, atap aytqanda, hayal-qızlar hám jas isbilermenler ushın qarjı xızmetleriniń qolaylıǵın arttırıw máseleleri de táreplerdiń dıqqat orayında boldı.
Sóylesiwlerde ıssılıq támiynatı, «jasıl» hám innovaciyalıq texnologiyalar, suw resurslarınan nátiyjeli paydalanıw sıyaqlı máselelerge ayrıqsha toqtap ótildi.
Ushırasıw sońında tárepler óz-ara birge islesiw perspektivaların belgilep aldı.

N.Ziyodullaeva, ÓzA