Nawayı mámleketlik kánshilik hám texnologiyalar universiteti janındaǵı Nókis kánshilik institutında «Direktor hám jaslar» ushırasıwı bolıp ótti.

Ilajǵa institut basshıları, jaslar awqamı jetekshisi, belsendi studentler hám ǵalaba xabar qurallarınıń wákilleri qatnastı.
Ushırasıwdı institut direktorı A.Kaipbergenov kiris sóz benen ashıp, sońǵı jılları elimizde Prezidentimizdiń basshılıǵında bilimlendiriw tarawında júrgizilip atırǵan reformalar, jaslarǵa jaratılǵan múmkinshiliklerge toqtap ótip, bunıń ayqın mısalın Nókis kánshilik institutı turmısında kóriwge bolatuǵınlıǵın kórsetip ótti.
Atap aytqanda, Prezidentimizdiń arnawlı pármanı tiykarında qaraqalpaqstanlı jaslarǵa joqarı oqıw orınlarına kiriw ushın berilgen kvotalar hám sırt ellerde oqıp atırǵan jaslardıń oqıwın mámleketimizdegi joqarı oqıw orınlarına kóshiriw ushın berilgen jeńillikler, sonıń menen birge, jaslardıń kásip-óner úyreniwi, isbilermenlik penen shuǵıllanıwı, ilimiy-izertlew jumısların alıp barıwı ushın jaratılıp atırǵan sharayatlardıń áhmiyetine toqtap ótti.
Ashıq sáwbetlesiwde studentler tárepinen jaslardıń bos waqıtların mazmunlı ótkeriw maqsetinde, kitapqumarlıq, intellektuallıq tańlawlar, sport jarısların kóbirek ótkeriw, shet tillerin úyreniw ushın kurslar shólkemlestiriw, jaslardı zamanagóy kásiplerge oqıtıw boyınsha pikir-usınıslar bildirildi hám bul máseleler institut direkciyası tárepinen úyrenilip, tez arada sheshiletuǵınlıǵı atap ótildi.

Adilbay Orazov,
Qaraqalpaqstan xabar agentligi sholıwshısı