(debdiw)

Xojaniyaz benen qádirdan dos edik. Bir-birimizdi jaqsı túsingenbiz. Ol haqqında «Qaraqalpaqstan jasları» gazetasınıń 2023-jıl, 28-sentyabrdegi sanında «Anıq maqsetine erisken sportshı» atamasında maqalam járiyalanǵan edi. Sonda quwanǵanın aytpaysız ba?! Ol jeńil atletikanıń yadro ılaqtırıw túri menen shuǵıllanıp keldi. Nókis olimpiada hám paralimpiya sport túrlerine tayarlaw orayında tálim aldı. Bilimin ele de tereńlestiriw ushın ótken jılı Ózbekstan mámleketlik denetárbiyası hám sport universiteti Nókis filialınıń studenti boldı. Grant tiykarında oqıp atır edi. Xojaniyaz jigirma jasında oylamaǵanda qolınan ayrıladı.

Túskinlikten shıǵıw ushın kóp háreket etti. Dostımız Xojaniyaz Erniyazov Ózbekstan Mayıplar Associaciyası Qaraqalpaqstan Respublikası aymaqlıq bólimine kompyuter qánigesi bolıp jumısqa kirdi. Ol bos waqıtların sportqa, basqa da jaqsı islerge baǵıshladı. Miynetiniń arqasında Nókis qalası bólimshesi baslıǵı dárejesine jetisti. 2024-jıl 24-dekabr kúni dostımızdı joǵalttıq. Onıń sońǵı xatı qolımızǵa kelip tústi. Kelinshegi xattı Mayıplar Associaciyası direktorına bergen eken.
Dostımnıń sońǵı xatın sizlerge de usınıp otırman.
Bilesiz be, men bazıbir adamlardan qapaman. Saw-salamat bola tura mobil telefondı alıp, jumsaq divanda shalqayıp jatadı. Kitap oqıwdıń ne ekenin de bilmeydi. Zımırap ótip atırǵan waqıttıń ǵániymet ekenin sezinbeydi.
Dostım mısalında kóp nárselerdi aytqım keledi.
Parij qalasında bolıp ótken 2024-jıl XVII paralimpiya oyınlarına qatnasaman dep tayarlıq kórgen edi. Biraq, oǵan qatnasıw nesip etpedi. Onıń sońǵı jazǵanların oqıp kóriń. Onıń jayları jánnetten bolǵay.
QÁLBIMDEGI GÁPLER
Assalawma áleykum, meniń pikirimdegi sırlaslarım!
Meniń aytajaqlarım kóp. Olardı jetkerip bere almasam kerek. Ózim basıp ótken jollarǵa názer salsam shorshıp ketemen. Ákemnen ajırasıp ketken anam bizlerdi baǵa almadı. Ákemizdiń qolında qaldıq. Kempir apamız qaradı. Ákemiz ullı boldı, bárimiz jasaǵan úyde hayalı, ulı menen jasap atır. Anam ekewi salǵan úyde endi bizler artıqshamız.
Sol waqıtları anamnıń ishinen neler ótkenlerin ózi ǵana biledi. Bizler bolsa ırıl-tırıl jasadıq. Shańaraq bolǵanlarımızdı sorlı anam kóre almadı. Basımnan sıypalaytuǵın ata-anam joq. Kún-kóris ushın shet elge barıp, jumıs isledim. Ol jaqta jumısqa úyrenip, islep atırǵanımda bir qolımnan baxıtsız hádiyse sebepli ajıralıp qaldım. Jáne qıyın kúnler baslandı. Bir músheden ayrılıwdıń azabın basına túskenler ǵana biledi. Úylendim. Kelinshegim meni túsinetuǵın, kewlime qaraytuǵın jaqsı insan. Sol jaǵına shın kewilden quwandım. Bir perzentli boldım.
Meni óz sınaqlarında qıynaǵan táǵdirim jáne oylamaǵanda qara kúnlerge qaray jeteledi. Qolımnan ayrılǵanda kóp qan joǵaltqanıma ma yaki kóp qıyınshılıqlar kórip, qıynalǵan qálbim sharshadı ma qan keselligine jolıqtım.
Dáslep bul haqqında esitkenimde aspan tóńkerilip, basıma túskendey boldı. Ómirimniń bunshelli qısqa ekenin bilip jasawdıń azabın sizlerge sóz benen jetkere almayman.
Kóz jaslarımdı, qálbimde jıynala berip taw bolǵan dártlerimdi jaqınlarıma kórsete almayman. Awırıw meni kem-kem óz qısımına aldı. Ómirimniń sońǵı demlerin jasap atırıp, qudaydan bir tilek tileymen. Kelinshegim, dawamshım jalǵız perzentim, eki tuwısqanımnıń ómiri uzın bolsın. Meniń jasay almaǵan jaslarımdı olarǵa bólip bersin. Ómirde jasay beriwiń múmkin. Biraq, qıynalmasın. Dárt adamdı túbinde kesellikke qaray jaqınlastıradı eken.
Bilesiz be adamlar, ele otızǵa da tolmadım. Eki jıl bar (1996-jıl Shımbay rayonında tuwıldım). Júregimniń soǵısı toqtaydı. Kiyatırǵan 2025-jıldı kútip ala almayman. Hár jılı saat 12 bolıwın asıǵıp kútken bolsam, oǵan bıyıl jete almayman.
Háy, insanlar az ǵana berilgen ómirde bir-birewimizdiń zeynimizge tiymey, sıylasıq penen jasań. Úlkenlerdi sıylań. Hámmeńizge densawlıq, awızbirshilik tilewshi sizlerdiń dostıńız Xojaniyaz.

Salamat AVEZOV, Nókis qalası.