Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ózbekstan Respublikası mádeniyat ministri Ozodbek Nazarbekov penen ushırastı.

Búgin 22-yanvar kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám Ózbekstan Respublikası mádeniyat ministri Ozodbek Nazarbekov penen ushırasıw ótkerdi.
Ushırasıwda mámleketimiz Prezidenti tárepinen mádeniyat hám kórkem óner tarawın reformalaw, onı jáne de rawajlandırıw máselesine úlken itibar qaratılıp atırǵanı, 2024-jıl juwmaǵında tarawǵa baylanıslı bir qatar áhmiyetli qararlar qabıl etilgenligi ayrıqsha atap ótildi.
Sonday-aq, húrmetli Prezidentimizdiń 2024-jıldıń 20-21-avgust kúnleri Qaraqalpaqstan Respublikasına saparı waqtında belgilep bergen tapsırmalarına muwapıq, 2025-jıldıń aprel-may aylarında Nókis qalasındaǵı «Aq quw» kompleksi hám Taxtakópir rayonında «Kóshpeli xalıqlar» xalıqaralıq festivalın ótkeriw hám 2026-jılı «Ayqulash» Qaraqalpaq mámleketlik milliy folklor ansambliniń 70 jıllıq yubileyin ótkeriw sıyaqlı máseleler dodalandı.
Ushırasıw dawamında Ózbekstan Respublikası mádeniyat ministri Ozodbek Nazarbekov Qaraqalpaqstan Respublikası Joqarǵı Keńesiniń Baslıǵı Amanbay Orınbaevqa «Madaniyat va sanyat fidokori» kókirek belgisin tapsırdı.

Qaraqalpaqstan xabar agentligi