Toy hám máresimler menen baylanıslı ısırapgershilikler, dábdebelik mashqalası keshe yamasa búgin payda bolǵan joq. Bul mashqala rawajlanıwdı súyiwshi babamız Mahmudxoja Behbudiydi de oǵada oylandırǵan. Bul másele búgin de jámiyetimizde joytılǵanı joq.

Bul áhmiyetli tema Bas ministrdıń orınbasarı – Shańaraq hám hayal-qızlar komitetiniń baslıǵı Zulayho Mahkamovanıń «Hayal-qızlar máripatı» jámiyetlik keńesiniń wákilleri menen ushırasıwı waqtında da hár tárepleme dodalandı.
Sebebi, artıqsha shıǵınǵa jol qoyıp, túrli, «úrp»lerge jol ashıwda, intaker bolıwda tiykarınan hayal-qızlardıń úlesi bar ekenligi hámmege jaqsı belgili.
– Búgingi kúnde toy hám máresimlerdegi artıqsha dábdebepazlıqlar máhállelerde sociallıq stratifikaciyalanıwǵa alıp kiyatırǵanı, shańaraqlarda tınıshlıq, salamat hám turaqlı qatnasıqlarǵa, perzentlerdiń tárbiyasına unamsız tásir kórsetip atırǵanı hesh kimge sır emes, – dedi Shańaraq hám hayal-qızlar komitetiniń baslıǵı Zulayho Mahkamova. – Tilekke qarsı, ısırapgershilikler, artıqsha dábdebepazlıqlar, qudalar arasındaǵı salamat emes arzıw-háweslerge tiykarlanǵan aldı-berdi kelispewshilikler shańaraqlıq ajırasıwlarǵa da sebep bolıp atırǵanın turmıslıq mısallar kórsetip turıptı.
Sóylesiw dawamında bul mashqalanıń barlıq sebep hám aqıbetleri hár tárepleme tallandı. Pikir-usınıslar bildirildi.
Sóylesiw dawamında tómendegi baǵdarlarda anıq tiykarlanǵan usınıslar islep shıǵıw zárúr ekenligi atap ótildi. Atap aytqanda, orınlarda xalıq, ásirese,hayal-qızlar arasında mazmunı jaǵınan bay, milliy qádiriyatlarımızǵa tiykarlanǵan ıqsham, ısırapgershiliklersiz toy hám máresimler ótkeriwdi úgit-násiyatlaw, toylar, máresimler hám basqa shańaraqlıq ilajlardı únemli etip ótkerip, baxıtlı hám abadan jasap atırǵan shańaraqlardı úgit-násiyatlawdı kúsheytiw búgin úlken áhmiyetke iye.
Hár bir aymaqtıń ózine tánliginen kelip shıǵıp, usınıslar islep shıǵıw, máhállelerde toy hám máresimlerdi únemli, ısırapgershiliklersiz ótkeriwde hayal-qızlar belsendileriniń «Aqıllı hayal-qızlar» háreketi aǵzaları, másláhátshi hayal-qızlar, qız ayttırıwshılar, keywanılar menen tıǵız birgelikte islesiwdi shólkemlestiriw dáwir talabına aylanǵanı ayrıqsha atap ótildi.
Orınlarda watanlaslarımız benen toydan aldın másláhátlesiw, saltanat hám máresimlerdi ıqsham ótkeriwdiń ózine, perzentlerine, jámiyetimizge paydası haqqında keń túsinikler beriw, ásirese, hayal-qızlar hám jaslarda usı sıyaqlı unamsız jaǵdaylarǵa keskin keypiyatın qáliplestiriw úlken áhmiyetke iye ekenligi atap ótildi.

N.Usmonova, ÓzA