Qırǵızstan-Túrkiya Manas universiteti Ádebiyat fakulteti docenti Еrdal Aydoǵmush (Erdal Aydoğmuş túrkshe usılay jazıladı) tárepinen «Karakalpak túrkleriniń ata sózleri (injeleme-metin-aktarma» (Qaraqalpaq naqıl-maqalları. Izertlew-tekst-awdarma)» kitabı baspadan shıqtı.

Kitap kirisiw, izertlew, tekst hám awdarma bóliminen ibarat. Kirisiw bóliminde Qaraqalpaqstan Respublikası, qaraqalpaq tili ¬hám qaraqalpaq ádebiyatı haqqında qısqa maǵlıwmat berilgen. Izertlew bóliminde naqıl-maqallardıń teması, naqıl-maqallardaǵı troplar, yaǵnıy, kórkem súwretlew quralları hám gáp túrleri izertlengen. Kitaptıń awdarma bóliminde jámi 1007 qaraqalpaq naqıl-maqalları túrk tiline awdarılǵan.
– Professor Еrdal Aydoǵmush qaraqalpaq tilinen basqa jáne rus, inglis, qırǵız, qazaq, ózbek, uyǵır tillerin jaqsı meńgergen filolog ilimpaz bolıp esaplanadı,-deydi Berdaq atındaǵı Qaraqalpaq mámleketlik universitetiniń Qaraqalpaq filologiyası hám jurnalistika fakulteti Jurnalistika kafedrasınıń baslıǵı, filologiya ilimleri boyınsha filosofiya doktorı Jańabay Marziyaev.
Ol 2014-2015-jılları Qırǵızstan-Túrkiya Manas universitetinde Shet tiller til úyretiw bóliminde, 2015-2021-jıl aralıǵında Ardaxan universitetinde, 2019-2021-jılları Axmet Yassauiy Túrk-Qazaq universiteti Túrk tili bóliminde jumıs islegen. 2022-jıldan baslap Qırǵızstan-Túrkiya Manas universitetiniń Ədebiyat fakulteti Túrkologiya bóliminde jumıs islemekte. Túrk tilleri boyınsha úlken tájiriybege iye qánige bolıp esaplanadı.
Bul kitap eki xalıqtıń doslıq qatnasıqların jáne de bekkemlew hám bir-birin jaqınnan biliwi ushın úlken áhmiyetke iye.

Á.Jiyemuratov,
Qaraqalpaqstan xabar agentligi