Rossiya Federaciyası Prezidenti Vladimir Putin hám Qıtay Xalıq Respublikası baslıǵı Si Czinpin arasında video arqalı sóylesiw bolıp ótti. Ushırasıwda eki mámleket arasındaǵı strategiyalıq sheriklik, qáwipsizlik máseleleri hám ekonomikalıq birge islesiwdiń bunnan bılay da rawajlandırılıwı dodalandı.

Vladimir Putin Rossiya hám Qıtay arasındaǵı sawda kólemi bıyıl 7 procentke ósip, 220-245 milliard AQSh dollarına jetkenin atap ótti. Rossiya Qıtayǵa neft hám tábiyǵıy gaz jetkerip beriw boyınsha jetekshi mámleket bolıp qalatuǵının atap ótiw kerek. Putin, sonday-aq, eki mámlekettiń energetika tarawındaǵı birge islesiwin bunnan bılay da bekkemlew hám basqa da tarawlarda da birge islesiwdi keńeytiwdiń áhmiyetli ekenligin atap ótti.
Putinniń aytıwınsha, fashizm ústinen erisilgen jeńistiń haqıyqıy tariyxıy mazmunın nadurıs yamasa buzıp kórsetiwge jol qoymaw, bul waqıya haqqında haqıyqıy maǵlıwmattı saqlap qalıw hám keleshek áwladlarǵa jetkeriw Rossiya hám Qıtay ushın ayrıqsha áhmiyetke iye. Ekinshi jer júzilik urıstaǵı jeńisti eslew eki xalıq ushın muqaddes bolıp tabıladı. Onıń sózlerine bola, Rossiya hám Qıtay bólinbes qáwipsizlikti támiyinlewde birgelikte jumıs alıp barmaqta hám kóp polyusli dúnya tártibin qollap-quwatlaydı.
Sonday-aq, Si Czinpin Rossiya menen qatnasıqlardı 2025-jılı jańa strategiyalıq basqıshqa kóteriwge tayar ekenin bildirdi. Onıń aytıwınsha, Qıtay hám Rossiya arasındaǵı birge islesiw tek ǵana energetika tarawında emes, al barlıq tarawlarda keń kólemli rawajlanıwdı támiyinlewge xızmet etedi. Qıtay jetekshisi, sonday-aq, shıǵıs baǵdarındaǵı Qıtay-Rossiya gaz qubırı belgilengen múddetinen aldın tolıq quwatlılıqqa shıǵarılǵanın málim etti.
Sóylesiw dawamında eki jetekshi xalıqaralıq kólemde kóp polyusli dúnya tártibin jaratıwǵa qaratılǵan háreketlerdi qollap-quwatlawdı, ekonomikalıq birge islesiw hám qáwipsizlik boyınsha strategiyalıq sheriklikti bunnan bılay da bekkemlew niyetinde ekenin bildirdi.

Qaraqalpaqstan xabar agentligi