«2025-jılda respublika máhállelerinde qáwipsiz ortalıqtı jaratıw hám huqıqbuzarlıqlardıń waqtında aldın alıw sistemasınıń nátiyjeliligin jáne de arttırıw boyınsha ilajlar haqqında»ǵı Prezident qararı qabıl etildi.

Qararǵa muwapıq, juwapker uyımlar hám mákemeler ushın 2025-jılı «Hár bir máhállede huqıqbuzarlıqlardıń waqtında aldın alıw» tiykarǵı wazıypa etip belgilendi.
Sonday-aq, máhhállelerde huqıqbuzarlıqlardıń aldın alıwǵa qaratılǵan bir qatar jol kartaları hám 2025-jılı respublika máhállelerinde qáwipsiz ortalıq jaratıw hám huqıqbuzarlıqlardıń waqtında aldın alıw sistemasınıń nátiyjeliligin arttırıw boyınsha mánzilli ilajlar baǵdarlaması tastıyıqlandı.
Huqıqbuzarlıqlardıń waqtında profilaktikası, Baǵdarlama hám «jol kartaları»nıń orınlanıwın qadaǵalap barıw ushın Bas prokuratura janında Respublikalıq uyımlararalıq muwapıqlastırıw jumısshı toparı dúziledi.
Endi, jınayat júz berilgen máhállelerde ilimiy shólkem hám bilimlendiriw mákemeleri tárepinen ilimiy processler tiykarında úyreniwler ótkeriledi.
Barlıq rayon (qala)daǵı sektor basshılarına, Milliy gvardiya qorǵaw xızmeti baslıqlarına hám ishki isler uyımları baslıqlarınıń orınbasarlarına 2025-jılı kriminogen jaǵday awır máhhálleler atpa-at biriktiriledi.
Juwapkerlerdiń jumısı hár aydıń juwmaǵında – ishki isler ministri janında, hár sherektiń juwmaǵında – Bas prokuror janında, hár yarım jılda Bas ministr janında sın kózqarasta dodalanadı, hár bir máhálle kesiminde Prezidentke málimleme berip barıladı.
Qararǵa muwapıq, wálayatlar orayları hám kriminogen jaǵday awır rayon (qala)lar máhállelerinde profilaktikalıq kishi inspektorı jumısı jolǵa qoyıladı. Kishi inspektor miynet migrantları, mektep pitkeriwshileri hám studentler menen birge islesedi.
Ishki isler uyımlarında migraciyalıq profilaktika bólimleri, rayonlararalıq hákimshilik konvoy toparları shólkemlestiriledi.
Sınaq túrinde kriminogen jaǵday awır aymaqlardaǵı profilaktika bólimlerinde hákimshilik ámeliyat toparlarınıń jumısı jolǵa qoyıladı hám olar jınayat isin qozǵatıwdan bas tartıwǵ
a baylanıslı hújjetlerdi rásmiylestiredi.
Máhálle huqıq-úgit-násiyatlaw oraylarınıń jumısı jolǵa qoyıladı. Oǵan profilaktika (úlken, kishi) inspektorları, hayal-qızlar máseleleri boyınsha, probaciya, jol kartası qáwipsizligi hám patrul-post xızmetleriniń inspektorları hám operativ-izlew xızmetiniń xızmetkeri kirgiziledi, Milliy gvardiya qorǵaw bólimleriniń naryadları xızmet alıp barıwı shólkemlestiriledi.
Nátiyjede – 5 ge shekem máhálle mikroaymaqqa birlestiriledi hám jınayatshılıqtıń aldın alıw boyınsha tez háreketleniw sisteması jaratıladı.

ÓzA