Rektor hám student-jaslar ushırasıwı – bul oqıw orınlarında bilimlendiriw hám ilimniń rawajlanıwı, studentlerdiń turmısı hám institutta ámelge asırılıp atırǵan jańalanıwlar haqqında pikir almasıw ushın oǵada áhmiyetli ilaj bolıp tabıladı. Bunday ushırasıwlar studentlerge basshıǵa óz sorawların beriw, mashqalalardı ashıq-aydın bildiriwi, rektor bolsa óz rejeleri hám instituttaǵı jańa baslamalar haqqında maǵlıwmat beriwi ushın imkaniyat jaratadı.

Usı maqsette Ájiniyaz atındaǵı Nókis mámleketlik pedagogikalıq institutında barlıq fakultetler kesiminde «Rektor hám jaslar» ushırasıwları shólkemlestirilmekte,-dep xabar bermekte instituttıń baspasóz xatkeri I.Mátekov.
Institut rektorı Q.Qodirov gezektegi usınday ushırasıw sheńberinde Baslawısh tálim fakultetiniń studentleri menen ashıq sáwbetlesiw ótkerdi.
Ilajda rektor student-jaslardıń mashqalaları hám usınısların tıńlap, olardıń pikirleri, baslamaları tiykarında instituttaǵı bilimlendiriw procesin ele de jetilistiriw boyınsha aldaǵı rejeleri menen ortaqlastı.
Ushırasıwda studentler de ózleriniń pikir-usınısların bildirip, oqıw hám ámeliyat barısındaǵı mashqalalardı atap ótti. Jaslar ushın kóbirek bos waqıtların mazmunlı ótkeriw, ámeliy kónlikpelerge iye bolıw, stajirovkalar shólkemlestiriw, oqıw procesin zamanagóy texnologiyalar menen támiyinlew, jaslardıń kitapqumarlıq mádeniyatın arttırıw boyınsha tańlawlar shólkemlestiriw, studentlerge hár qıylı tarawlarda qosımsha treningler ótkeriw boyınsha usınıslar bildirildi.
Rektor instituttıń bilimlendiriw sapası hám student-jaslar ushın jaratılǵan sharayatlardı turaqlı túrde jańalawǵa ayrıqsha dıqqat qaratılıp atırǵanlıǵın atap ótip, studentlerge aldaǵı waqıtları da óz pikir-usınısların bildiriwi ushın imkaniyatlar jaratılatuǵını hám bul arqalı instituttıń jumısların bunnan bılay da nátiyjeli shólkemlestiriw rejelestirilip atırǵanlıǵın málim etti.
Sonday-aq, rektor ushırasıw dawamında jaslardıń bilim alıwǵa bolǵan qızıǵıwshılıǵın xoshametlew, olardıń bilim hám kónlikpelerin rawajlandırıw maqsetinde jańa baslamalar islep shıǵılatuǵınlıǵı tuwralı maǵlıwmat berdi.
Álbette, bunday ushırasıwlar student-jaslardıń baslamaların ámelge asırıw ushın tiykar jaratadı. Institut rektorınıń fakultetler kesimindegi studentler menen ushırasıwları dawam etpekte.

Qaraqalpaqstan xabar agentligi.