«Baslamalı byudjet» joybarınıń 2024-jıldıń 2-məwsiminde Qońırat rayonındaǵı 37-sanlı ulıwma orta bilim beriw mektebiniń 1 qabatlı ońlaw zárúr bolıp qalǵan imaratın ońlaw həm oqıwshılardı kəsipke úyretiw orayın shólkemlestiriw boyınsha 1 mlrd. 360 mln. sumlıq aqsha ajıratıw usınısı kirgizilip, dawıs beriw nətiyjelerine bola bul joybar jeńimpaz dep tabılǵan edi.
Mekteptiń oqıwshılardı kəsipke úyretiw orayınıń imaratı «Nókis qutlı qádem» juwapkershiligi sheklengen jəmiyeti tərepinen əmeldegi ońlawdan shıǵarılıp, keń jámiyetshilik wákilleri, taraw veteranları, miynet jámáátiniń qatnasıwında paydalanıwǵa tapsırıldı.
Oqıw orayınıń ashılıw saltanatında rayon hákimi B.Madaminov shıǵıp sóylep, Prezidentimizdiń baslaması menen “Jańa Ózbekstan – mektep bosaǵasınan, təlim-tərbiyadan baslanadı” degen ideyası tiykarında alıp barılıp atırǵan keń kólemli reformalarǵa toqtap ótti.
Atap ótilgenindey, bul oray aymaqtaǵı jaslardıń oqıw menen bir qatarda kásip-óner iyelewine úlken múmkinshilik jaratadı. Jaslar da jaratılǵan usınday sharayatlardan utımlı paydalanıwı, elimizge zárúr qánige, kámil insan bolıp jetilisiwi ushın háreket etiwi kerek.
Kásipke úyretiw orayında kompyuter operatorı, tigiwshilik, temir ustası dógerekleri shólkemlestirilgen bolıp, kásipke úyretiw hám pán dógereklerine 179 oqıwshı qamtıp alınǵan.
Ilaj qatnasıwshıları orayda jaratılǵan sharayatlar menen tanısıp, pikir-usınısların bildirdi.

Qaraqalpaqstan xabar agentligi.