Qaraqalpaqstan Respublikası Joqarǵı Keńesiniń Baslıǵı A.Orınbaev Taqıyatas rayonındaǵı bir qatar máhállelerdiń puqaraları menen ushırasıp, mashqalaların tıńladı.

Dáslep, shetki Saraykól awıl puqaralar jıyını turǵınları menen ushırasqan Joqarǵı Keńes Baslıǵı máhálledegi infrastruktura menen baylanıslı máseleler basqıshpa-basqısh óz sheshimin tabatuǵınlıǵın, Prezidentimizdiń tapsırması menen xalqımızdıń turmısın jaqsılaw boyınsha orınlı kóterilgen mashqalalar saplastırılatuǵınlıǵın atap ótti.
Usı jerde aymaq turǵınları taza ishimlik suwı menen baylanıslı mashqalası bar ekenligin bildirip, bul mashqalanı saplastırıwǵa 30 mln. sum qarjı ajıratıldı.
Bunnan soń «Jayhun» máhállesi turǵınları menen ótkerilgen ushırasıwda gaz tarmaqların tartıw máselesi kóterilip, bul mashqalanı sheshiw ushın kerekli bolǵan 30 mln. sum qarjını búginniń ózinde ajıratıw boyınsha tiyisli tapsırma berildi. Puqaralar menen pikirlesiw barısında Joqarǵı Keńes Baslıǵı Aydın jol hám Doslıq mákan puqaralar jıyınlarınıń turǵınları menen de ushırasıp, awır sharayattaǵı bul máhállelerdi abadanlastırıw ushın Prezidentimiz tárepinen tiyisli qarjılar ajıratılǵanı, infrastruktura menen baylanıslı mashqalalar óz sheshimin tabatuǵınlıǵın atap ótti. Óz gezeginde aymaq turǵınları da Prezidentimizdiń bunday itibarı hám ǵamxorlıǵı ushın ayrıqsha minnetdarshılıǵın bildirdi.
Joqarǵı Keńes Baslıǵı rayon aymaǵında sociallıq qorǵawǵa mútáj shańaraqlardı jaylastırıw ushın qayta rekonstrukciyalanıp atırǵan obyekttegi jumıslardı barıp kórdi hám qurılıs jumısların sapalı etip juwmaǵına jetkeriw kerek ekenligin atap ótti. Házirgi waqıtta bul jerde 45 shańaraqqa mólsherlenip, ońlaw jumısları ámelge asırılmaqta. Sonday-aq, qosımsha 27 shańaraqtı jaylastırıw ushın jańa imarat qurılıwı belgilengen.
Bunnan soń rayon orayındaǵı diyqan bazarı barıp kórildi. Juwapkerlerge qarıydarlar hám satıwshılarǵa qolaylı sharayatlar jaratıw, sonday-aq, ámelge asırılıwı kerek bolǵan basqa da áhmiyetli ilajlar boyınsha anıq tapsırmalar berildi.

Qaraqalpaqstan xabar agentligi