Densawlıqtı saqlaw ministri Asılbek Xudyarov Qazaqstan Prezidentiniń isler basqarması medicina orayı basshısı Aleksey Coy basshılıǵındaǵı delegaciya aǵzaları menen ushırasıw ótkerdi. Onda sol mámlekettiń mámleketimizdegi Ayrıqsha hám tolıq huqıqlı elshisi Beybut Atamqulov ta qatnastı.

Bul haqqında DSM baspasóz xızmeti xabar berdi.
Sóylesiwden aldın miymanlar Ózbekstan Prezidenti Administraciyası janındaǵı Medicina bas basqarmasınıń 1-sanlı Oraylıq konsultativ-diagnostika poliklinikasında bolıp, onıń jumısı menen jaqınnan tanıstı. Atap ótilgenindey, sońǵı jılları eki mámleket arasında densawlıqtı saqlaw tarawında óz-ara paydalı birge islesiw baylanısları izbe-iz rawajlanbaqta.
Atap aytqanda, búgingi kúnde 100 den aslam qazaqstanlılar mámleketimizdiń túrli medicinalıq joqarı bilimlendiriw mákemelerinde bilim almaqta.
Sonday-aq, 2024-2025-oqıw jılınan Buxara mámleketlik medicina institutı hám Al-Farabiy atındaǵı Qazaqstan milliy institutı menen birge islesiwde birgeliktegi bilimlendiriw baǵdarlaması jolǵa qoyılǵan.
Elimiz medicina mákemelerinde qazaqstanlı kásipleslerdiń qatnasıwında sheberlik sabaqları hám kórgizbeli xirurgiyalıq operaciyalardı ótkeriw dástúrge aylanǵan. Sóylesiw dawamında Densawlıqtı saqlaw ministri A.Xudyarov bul baǵdardaǵı birge islesiwdi jáne de rawajlandıırw boyınsha óz usınısların bildirdi.
Ushırasıw dawamında eki tárepleme baylanıslardıń búgingi jaǵdayı hám perspektivadaǵı rejeler dodalandı.
Sonıń ishinde, Aleksey Coy ózi basshılıq etip atırǵan medicina mákemesinde jolǵa qoyılǵan menedjment sisteması haqqında maǵlıwmat berdi. Bul aldıńǵı tájiriybe mámleket segmentin básekige shıdamlı tarmaqqa aylandırıwǵa hám kadrlar potencialı hám emlew kórsetkishlerin jaqsılawǵa xızmet etetuǵını atap ótildi.

ÓzA